Excavator chahbi la lêt turin sorkar phût

Congress ṭhalaite chuan, Vairengte Aitlang rama excavator (JCB) hmanga kawng laitu zinga pakhat, Assam police-te'n September 2, Ningani chawhnua kut an thlak bakah, excavator chahbi an chhuhsak chu lak letsak ngei turin Mizoram sorkar an phût.

MPYCC chuan thuchhuah siamin, Assam police-te kut tuartu Lalnarammawia s/o R Biakmawia (L) Kolasib Vengthar chu a nâk ruh a auh a, a bengah thî a chhuak a, a zun a thî niin an tarlang a, "Inah hna thawk thei loin a awm mek. Zangnadawmna pe turin Assam sorkar bakah, venhimna tiam chunga venghim lotu Mizoram sorkar kan phût a ni," an ti.

Congress ṭhalaite chuan, Lalnarammawia chu a mobile phone leh excavator chahbi Assam police-te'n an chhuhsak tih sawiin, "An la pe let lo a, thuneituten an lak lêtsak ngei kan phût," an ti. Ramri hnaiha Mizoram police-te duty camp panna kawng tur laitute sahimna pe turin Kolasib District Magistrate chu ziakin a intiam tih sawiin, "Venhimna pek an nih loh avanga kut tuar an awm hi pawi kan tiin ná kan tih pui tak zet a ni," an ti bawk.