Ayush Apke Dwar hman a ni

India-in zalenna a hmuh champha vawi 75-na lawmna 'Azadi ka Amrit Mahotsav' kal zelah National Medicinal Plants Board, Ministry of Ayush ruahmannain nimin khan Secretariat tualah Ayush Apke Dwar (Ramhmul damdawi kawtkaiah) tih hun hman a ni a, Health minister Dr R Lalthangliana'n a hmanpui.

Dr R Lalthangliana chuan, sorkar laipuiin chhung tinte ramhmul damdawi (medicinal plant) uar leh zual tura a duh avangin ramin zalenna a hmuh kum 75-na lawmna pualin hun buatsaih a nih thu a sawi a, "State Medicinal Plants Board-in ramhmul damdawi, thlai chi hrang hrang a sem dawn," a ti a; mahni kawtkaiah leh hmun an neih remchang apiangah phun a, ṭangkai taka hmang turin a sáwm.

Tun hma lam aiin sorkar laipuiin ramhmul damdawi hman kawngah ṭan a la nasa tih sawiin Health Minister chuan, "Damdawi siamtu company liante pawhin ṭangkai taka an hman ṭhin medicinal plant-te hi Mizoramah pawh dam loh nikhuaa inenkawlna atan hman ṭangkai i tum ang u," a ti.

Ayush Apke Dwar hman zawhah Secretariat Complex-a hmun remchangah Káwldái (Justicia Adhatoda) ṭiak phun a ni a, kalkhawmte hnenah sem a ni bawk.