NGO leh party-te'n ramri chungchangah Central-ah memorandum an thehlut dawn
MZP chuan Inrinni khan an pisaah tlawmngai pawlte leh political party-te sâwmin, Consultation Meeting on Mizoram-Assam Boundary an buatsaih. Kalkhawmte chuan, resolution pass-in Assam leh Mizoram ramri chungchahangah sorkar laipuiah memorandum thehluh ni se, an ti.
Meeting hi MZP treasurer Michael Lalramsanga'n a kaihruai a; MZP president L Ramdinliana Renthlei chuan, hnam anga ṭan rual hun a nih thu sawiin, "Political party anga hamṭhatna emaw advantage lak tumna chi a ni lo a, hnam leh ram issue tak tak a ni a, Mizo anga kan ṭan rual hun tak a ni," a ti.
MZP President chuan, tun hmain Mizoram roreltute'n ramri chungchangah theihtawp chhuahin hma an lo la tawh ṭhin tih sawiin, "Tih fuh leh tih fuh loh lai deuhte an nei ang, hun kal tawh kha siamṭhat theih a ni tawh lo," a ti a; tun aṭanga bul ṭan ṭhat leh a ṭul thu a sawi.
Bairabi Zophaia MZP-in Zofate Chawlhbuk an saknaa chanchin ngaihvena kal Mizoram chanchinbumite, chanchinbumi an ni tih hre reng chunga Assam police-te'n kut an thlak chu an dem thu sawiin, "Chawlhbuk sakna hmunah hian Assam chanchinbumite pawh an awm ve reng laia Mizo chanchinbumite chiah kut an thlak hi kan dem tak zet a, Mizote min hmuhsitnaah kan ngai a ni," a ti.
Meeting-ah hian political party tinin aiawh an tir a, NGO hrang hrang aiawhte an tel bawk.
Meeting resolution
1) 1875 Bengal Eastern Frontier Regulation-a pillar an rawn phunna chin hi kan pipute luah chin ram a nih angin Mizote chuan hei bak hi Assam leh Mizoram ramri kan nei lo.
2) Bairabi Zophaia Ch. Chhunga (L) leileta MZP-ten Zofate Chawlhbuk sak an tum hi ṭha kan ti a, Zofate Chawlhbuk hi ding ngei se ṭha kan ti bawk.
3) Zophaia MZP-in Mizoram chhungah Zofate Chawlhbuk sak an tum Assam police-te'n silai nena an bei hi kan dem tak zet a ni.
4) Zirlai pawi sawi lote silaia kahtir a, firing order petu Hailakandi DC Adil Khan hi kan dem tak zet a, India sorkarin a phu tâwk hremna pe ngei rawh se.
5) Zofate Chawlhbuk saknaa a hmun ngeia chanchin ngaihven tura kal Mizoram chanchinbumite (news reporter), chanchinbumi an ni tih hre reng chunga Assam police-te'n na taka kut an thlak hi kan dem tak zet a ni.
6) Mizoram Assam ramri chungchangah all party leh all NGO angin memorundum President, Prime Minister leh Union Home Minister te hnenah thehluh ni se ṭha kan ti.
7) Mizoram leh Assam ramri chungchang zir chiangtu tur Expert Committee siam tura ngenna Mizoram sorkarah thlen ni rawh se.
8) March 24, 2018-a all NGO leh all political party kalkhawmte chuan kan ram humhalh turin lungrual taka ke pênho zel ni se ṭha kan ti.