April 20-ah CADC an inthlang dawn

Mizoram State Election Commission chuan March 23, Zirtawpni tlai khan Chakma Autonomous District Council (CADC) inthlan hun tur a puang. Inthlan hun atan April 20, 2018 ruat a ni a, CADC huam chhungah model code of conduct hman nghal a ni.

Member 20 awmna CADC inthlana chuh duhte tan March 24 aṭangin returning officer (RO) hnenah hming pek luh theih a ni a, April 4 tlai dar 3 thleng hming pek luh theih a ni ang. April 5-ah nomination endik a ni ang a, inhnûkdâwk duh tan April 6 tlai dar 3 thleng hun hawn a ni dawn.

April 7-ah candidate-te chhin­chhiahna pek a nih bakah an hming târ chhuah a ni ang a; April 20 zing dar 7 aṭanga tlai dar 5 thleng vote thlak tur niin, vote-te chu April 24 zing dar 8 aṭanga chhiar a ni ang. Inthlanna pumpui hi April 28-ah zawh vek tura ruahman a ni a, MDC thlan tharte ṭhutkhawm hmasa ber chu May 4-ah neih tur a ni.

CADC inthlanna neih turah hian voter 30,565 an awm a, vote an thlakna turin polling station 66 siam a ni a, polling station lian deuh vote nei mi sang chuang awmna pali-ah a belh chhahna auxilliary polling station pakhat ṭheuh siam belh a ni.

Tarlan tawh angin, March 22 khan Governor chuan CADC sorkar a ṭhiat a, rorelna kengkawh turin Lawngtlai DC Dr Arun T a ruat nghal. CADC ṭhiah a nih chhan hi, dan bawhchhiaa thil an tih vang niin sorkar thuchhuah chuan a tarlang.

Hetih lai hian, Mizoram sorkar chuan Lawngtlai DC Dr Arun T chu Aizawlah a sawn nghal a, special secretary atan dah a ni a; Lawngtlai DC turin DMR director N Chakhai ruat a ni.

CADC-ah hian Congress party-in member 17 neiin ro a rel a, an term ding lai chu April 2018-a tâwp tur a ni.