World TB Day pualin hun hman a ni

March 24, Inrinni khan World TB Day pualin Mizoram hmun ṭhenkhatah hun hman a ni. Aizawlah chuan Mizoram State Health Society (TB Control) buatsaihin Tourist Lodge-ah hman a ni a, Health minister Lal Thanzara'n a hmanpui. Thupui chu - 'Mamawh: TB awm lohna khawvel atan hma hruaitu' tih a ni.

Health Minister chuan, India chu TB vei tamna ber ram a nih thu sawiin, "World TB Day thupui ang hian kan thawhna ṭheuhah, sorkar leh NGO hrang hrangte bakah, mimal angte pawha TB natna ûm bo turin kan ṭanrual a, hruaitu anga hma kan lak ṭheuh a ṭul tak zet a ni," a ti.

Kum 2017 chhunga TB zawn chhuah beihpui an thlaknaa mi sing khat chuang endik zingah mi 15-in TB an vei tih hmuh chhuah a nih thu sawiin Lal Thanzara chuan, "TB vei dap chhuahna kawngah Central TB Division aṭangin medical mobile van Mizoram sorkarin an dawng," a ti a; awlsam zawka TB hrik hmuh chhuah zung zung theihna tur Catridge Based Nucleic Acid Amplification Test (CBNAAT) pasarih Aizawl Civil Hospital leh medical mobile van-ah a awm thu a sawi.

Health Minister chuan, private doctor, laboratory leh private hospital-a TB hmuhchhuah leh enkawlte chu danin a phût angin sorkarah report vek tur a nih thu a sawi a, "He natna inkai darh theih, tih dam theih ni si, ngaihthaha hlauhawm tak TB hi a tawp theih nan kan zavaiin hma hruaitu nih i tum ṭheuh ang u," a ti.

Inkhawm hi NHM mission director Dr Lalrozama'n kaihruaiin, department hrang hrang aiawh leh tlawmngai pawl hruaitute an tel a; state TB officer Dr Vanlalfela'n TB dona kawnga kum 2013-2017 chhunga an hmalaknate a tarlang.