MP pahnih chungah MJA an lawm

MJA General Head­quarters chuan thuchhuah siamin, Bairabi Zophai hmuna Mizoram jour­nalist-te Assam police-te'n kut an thlak avanga MJA-in sorkar laipuia thuneitu hrang hrangte hnena vuivaina a thlente lo bawhzuisaktu Lok Sabha MP CL Ruala leh Rajya Sabha MP Ronald Sapa Tlau te chunga an lawm thu an tarlang.

MJA tarlan danin, Mizoram journalist-te kut tawrh chungchang hi thlalak nen kimchanga taka tarlangin Prime Minister, Union Home Minister, Information & Broadcasting Minister, DoNER Minister, Assam Chief Minister, National Human Rights Commission, National Commission for Women, Press Council of India-ahte an thlen a ni.

MJA hian an thu thlen­te chu New Delhi-a lo buaipuisak turin Mizoram MP pahnihte an ngen a; Rajya Sabha MP Ronald Sapa chuan MJA lehkha pawimawh zawng zawng chu a dawngtu turte hnena a pe vek a, ṭawngkamin a tuihnih vek bawk.

Lok Sabha MP CL Ruala pawhin Mizoram journalist-te'n Assam Police-te kut an tawrh chungchang hi Supreme Court advocate Dr. Anish Agarwal a sawipui a; Dr Anish Agarwal hian Assam Police kut tuar Mizoram journalist-te'n zangnadawmna an hmuh ngei theih nan a ṭulna apiangah theihtawp chhuahpui a inhuam thu MJA-te a hrilh a ni.