KHAWTHLIR

MR bill vbc. 116.7
Finance minister Lalsawta chuan March 23-a Assembly session-ah MPC member Lalthanliana leh MNF Dr. K Beichhua te zawhna inṭâwm ziaka chhangin, kum 2017-18 chhungin sorkar department hrang hrangte'n medical reimbursement (MR) atana sum an dil zat chu cheng vbc. 116.7 a ni tih a tarlang. Finance Minister tarlan danin, MR bill cheng vbc. 116.7 aṭang hian cheng vbc. 104.85 pek tawh a ni a, pek loh cheng vbc. 11.92 a awm.

Thisen pe
Salvation Army Youth, Central South Division hnuaia Keifang SAY-te chuan Inrinni khan Aizawl Civil Hospital (ACH) tan thisen unit 65 an pe a, a petute mipa 51 leh hmeichhia 14 an ni. ACH tan vek Ratu Students Union-te'n unit 10 an pe bawk. Kolasib Venglai Branch KṬP-in Kolasib District Hospital tan thisen unit 29 an pe a, a petute mipa 14 hmeichhia 13 an ni a; Tuikual South Branch KṬP member mipa 21 leh hmeichhia pakhatte'n Synod Hospital tan unit 22 an pe bawk.

Dîm dawn lo
Chanmari West Branch YMA huaihawta an veng chhunga kohhran hrang hrang, Local Council leh tlawmngai pawl hrang hrangte March 22, Ningani zana YMA Zawlbuka ṭhukhawm chuan, an veng chhunga ruihhlo ti ṭhinte leh veng dang aṭanga ruihhlo zuar ṭhinte man an nih chuan an dîm dawn lo tih an puang. NH-54 kawngpui kama lirthei chhiate chu a rang lama senghawi turin a neitute an hriattir bawk.

NLUP sem
Nimin khan BNRGSK Hall, Aibawkah Aizawl South-III bial chhunga Agriculture department hnuaia WRC-I, WRC-II, oil palm leh fu chin thlangtu chhungkaw 244 hnenah ṭanpuina sem a ni a, bialtu MLA leh Agriculture minister KS Thanga'n a hmanpui.

Centenary lawm
Baptist Church of Mizoram (BCM) Rawpui kohhran chuan March 19-25 chhung khan an kohhran kum 100 tlin an lawm a, thupui chu 'Min hruaitu Lalpa' tih a ni. BCM Rawpui hi kum 1918 khan Rawpui tlang sanga awm laiin din a ni a, tunah hian kohhran chhungkua 124 awmin, member 620 vel an awm mek.