Internet hmanga hna zawnna leh Lehkha zirna MZU-ah hawn a ni

Internet hmanga hna zawng duhte puih theihna tur leh internet hmanga lehkha zir theihna tur, Massive Open Online Courses (MOOC) leh Employment Linked Skill Programme (ELSP) chu March 23 khan Mizoram University-ah Planning secretary Dr C Vanlalramsanga'n a hawng.

Dr C Vanlalramsanga chuan, zirlaite tana ṭangkai tur online course MZU kaltlanga tih theih a ni ta chu lawmawm a tih thu sawiin, "Tunlaiah e-Learning hi mi tam takin an chhawr ṭangkai tawh. Survey hrang hrang aṭanga a lan danin, hna ṭha tak tak hmuh phahte an awm ṭeuh a ni," a ti a; online course chu ṭhalaite tan zirna kawnga hmasawnna ṭangkai siamtu leh hna zawnnaah thui taka puitu a nih a beisei thu a sawi.

MZU vice chancellor Prof. KRS Sambasiva Rao chuan, "Information and communication technology thiamna hmang ṭangkaiin internet kaltlanga course hrang hrang zir theihna tura hmalakna hian hmun kilkhawr zawka awmte tan hamṭhatna tam tak a thlen a ni. MOOC hi India hmarchhak state zinga a hmasa ber leh a la awmchhun a ni," a ti.

MZU hian Schoolguru Eduserve Pvt Ltd. nena thawk dunin MOOC atan website hranpa http://www.mzuict.in an siam a, chummi hmang chuan course hrang hrang 13 MZU hnuaiah zir theih a awm tawh. Course dang dah belh turin hmalak mek a ni a, chu'ng zingah chuan hna zawn kawnga pui theitu tur job-oriented course-te telh tum a ni.

MOOC hnuaiah hian certificate leh diploma course-te zir theih a ni a, zir duhte chuan website-ah in register in, an course duh an thlang thei. ELSP hi corporate khawvela hna thawk duhte tana thiamna leh hriat tur ṭul ṭangkai hrang hrang, internet kaltlanga inzirtirna a ni. Desktop, laptop, tablet leh smartphone hmangin, thla thum chhunga zawh theih tura ruahman a ni a, registration fee-ah Rs. 100 chawiin, course zote chuan paid internship an hmu thei dawn a ni.

Zirlai, an graduate hnua ELSP course zo tawhte chuan Schoolguru Eduserve thawhpui, Teamlease Services-te'n company hrang hrangah placement an zawnpui dawn a ni.