Mizoram budget hi Mizo mipui Bum tumna niin a lang - BJP

Mizoram BJP chuan Inrinni khan an pisaah thuthar thehdarhtute an kâwm a; kum 2018-19 atana Mizoram budget chu mipui bum tumna nia an hriat thu sawiin, "Budget-ah hian Mizo mipuite harsatna leh mamawh sutkian tumna a awm lo," an ti.

BJP general secretary Vanlalhmuaka chuan, budget chu mipui sum a nih thu sawiin, "Budget hi inthlan kum a nih avanga sorkarna chelhtu Chief Minister leh a hote sum siamna budget, mipui vote lei tumna budget-ah kan ngai. NEDP atana cheng vbc. 1000 hi eng atana hman tur nge? A hmanna lam tur an siam dan en phei chuan mipui chan tur a awm lo tluk a ni," a ti a; budget-ah hmasawnna hna thawhna tur ruahmanna a awm lo niin a sawi.

Vanlalhmuaka chuan, budget chu Lal Thanhawla leh a chhungte nawm chenna tur budget nia sawiin, "Kan ram chhung hmun tinah kawng a chhia a, ṭhalaite tan hna thawh tur siam kawnga hmalakna ṭha hmuh tur a awm lo, hmasawnna leh ram leh hnam rotling siam tumna lam pawh a lang lo. Zirna lamah zirtirtu an indaih lo a, zirna standard a chhe em em a ni. Hriselna lamah, emergency puan ngai khawpin mipui kan damlo. Mizoram mipuiin kan mamawh chhanna budget-ah ngaihthah vek a ni," a ti.

NLUP Implementing Board (NIB)-in February 9, 2018-a Congress MLA-te chauh NLUP dawng tur an bial chhunga mi 400 thlang tura an ti chuan NLUP chu sorkar flagship programme ni loin, Lal Thanhawla leh a hote sum siamna a ni tih tilang chiang nia sawiin, "He thil hi BJP chuan a ngai thutak hle," a ti a; Mizoram sum chu Congress ni loin, Mizo mipui sum a ni tih Chief Minister an hriattir tur thu a sawi a ni.