August 2021-a SRH-a thi zingah Covid vaccine la kim mi 12 an tel

Health minister Dr R Lalthangliana kaihhruaiin September 4, Inrinni khan Secretariat conference hall-ah Health department hotute'n Covid-19 donaa hmalak dan an thlirho a; August 2021 chhunga State Referral Hospital (ZMC)-a Covid-19 vei thi zingah Covid-19 vaccine la kim tawh mi 12 an tel thu an tarlang.

Ṭhutkhawma tarlan danin, kumin August thla khan SRH-ZMC-ah Covid-19 vei enkawl lai mi 53 an thi a; chu'ng zinga mi 12 chu Covid vaccine la kim tawh niin, dose khatna la hman mi dang 12 an awm bawk a, mi 29 chu vaccine la la lo an ni thung.

ZMC hotute chuan, Covid-19 vei thi zingah a hmaa hrisel ṭha, insawiselna nei lo an awm nual tawh thu sawiin, "A chhan ni bera lang chu Covid-19 hi virus thar a nih avangin kan taksaa rál dotute'n an la hmelhriat loh avangin lo beih dan tur tâwk an hre ṭhin lo a, mi tinin virus kan do lêt dan a inang lo a ni," an ti.

Covid-19 hripuiin nasa takin mipui rilru a nghawng tih sawiin, "Hripui vei leh kái lo zingah pawh Covid-19 vanga rilru lama harsatna neite chuan inthlahrung loin mental health specialist-te biak ṭhin ni se," an ti a, district tinah mithiam an awm thu an tarlang.

Ṭhutkhawmah hian, home isolation-a awm zingah inkaih­hruaina zawm ṭhat loh vanga chhungkuaa hripui inkài chhâwng an tam tih tarlan a ni a; inkaihhruainate zâwm ṭha turin mipui an ngen.

Hripui donaa thawktute mamawh hmanrua leh damdawi a tam tâwk thu tarlan a ni a, chawhrualin ni tin PPE 400 vel an hmang ṭhin. PPE chu 1,600 vel (ni li daih) chiah a awm tawh rualin, tualchhunga PPE ṭhui eng emaw zat an awm avangin thlaphànna tur a awm loah an ngai.

N-95 mask chu ni tin 400 vel an hmang ṭhin a, tunah thla hnih daih an la kawl. Mask inthuah (three layer mask) chu ni tin 700 vel an hmang a, thla 10 daih an la nei. Ni tin kutkawr 920 vel an hmang a, thla 9 daih a la awm. Kut tihfaina (hand sanitizer) ni 100 daih an la nei a, sodium hypochloride thla khat daih an nei. Viral transport medium (VTM) ni tin 1,500 vel an hmang a, thla ruk daih a la awm; RAT kit ni tin 12,000 vel hmang anga chhûtin thla khat daih a la awm bawk.

Dedicated covid hospital, SRH-ZMC a khat reng a, khum 50 awmna MRB DCHC leh khum 40 awmna Kulikawn Hospital DCHC pawh a khat deuh reng a; SRH ICU pawh a khat deuh reng a ni.

Covid-19 vaccine a tam tawk a, identity card nei lo tan Thawhlehni leh Ningani apiangin Dawrpui Multipurpose Hall leh Bawngkawn South YMA Hall-ah lak theih a ni. IDSP hmalaknain July 20 aṭangin khua/veng 79-a endik rûnpui neihah sample 1,02,397 endik aṭangin hripui vei mi 3,074 hmuh chhuah a ni.