HC judge atan Marli Vankung rawt

Supreme Court Collegium chuan tun hnai khan India rama high court judge atan mi 68 a rawt a, chu'ng zingah chuan Marli Vankung, Republic Veng a tel.

Thudawn danin, Supreme Court Collegium-in high court judge atana an rawtte chu President Ram Nath Kovind pawmpui a ngai a, hetianga tih hi kalphung pangngai a ni a; President hian a pawmpui hnuah judge atana ruatna order tihchhuah a ni ang.

Marli Vankung hi kum 1989 khan Mizoram Judicial Service (MJS)-ah a tling a, Mizoram sorkar hnuaiah deputation-in Law & Judicial additional secretary leh secretary hnate a chelh tawh a, tunah hian Aizawl District Court-ah additional district & session judge a ni mek.

Marli Vankung hi Gauhati High Court judge atana rawt a ni a, rawtna hi President-in a pawm a nih chuan Mizo zingah high court judge palina a ni dawn a, Mizo hmeichhe zingah a hmasa ber a ni ang. Mizo zinga high court judge lo ni tawh leh ni mekte chu - T Vaiphei, Michael Zothankhuma leh Nelson Sailo te an ni.