Zirtirtu ṭha chawimawina dawngtu Jacinta Vanlalengzami

Nimin khan Teachers' Day pualin India rama zirtirtu ṭha chawimawina dawngte hnenah National Awards to Meritorius and Outstanding Teachers hlan a ni a; chawimawina dawngtu zingah North Vanlaiphaia A&M Grandchild School head­mis­tress Jacinta Van­lalengzami a tel.

Zirtirtu ṭha chawimawina hlan inkhawm online kaltlangin neih a ni a; Aizawl­ah chuan NIC video confe­rence hall-ah School Education joint director Lalhmachhuana kaihhruaiin hman a ni. Award hi President Ram Nath Kovind chuan a dawngtu mi 44 hnenah a hlân a, chumi hnuah President aiawhin School Education secretary Dr Lalzirmawia Chhangte-in Jacinta Vanlalengzami hnenah a hlân a ni.

Kuminah hian India rama zirtirtu nuai 97 chuang zinga mi 44 hnenah zirtirtu ṭha chawimawina hlan a ni a, award hian thuchei, medal leh Rs. 50,000 a keng. Mizoramah mi 76-in national award an dawng tawh a, chu'ng zinga mi 65 chu pension tawhin, mi 11 an thawk mek a, mi 28 an thi tawh.

Zirtirtu 53-in state award an dawng tawh bawk a, national award leh state award dawng kawp Mizoramah mi 23 an awm tawh a ni. Jacinta Vanlalengzami hian kum 1995-ah zirtirtu hna a thawk ṭan a, kum 2008 aṭangin headmistress a ni. Zirlaibu thiamna piah lamah co-curricular activity a ngai pawimawh a, Bharat Scouts and Guides-ah sûlhnu tam tak neiin, Ministry of Culture hnuaia Centre for Cultural Resources and Training-ah district resource person a ni mek.

National Integrated Forum of Artists & Activists-ah Mizoram State president leh national executive member a ni a, Save Indian Education through Innovation of Indian Education-ah Mizorama hotu ber leh national executive member a nih bakah, Socio Economic Research Institute-ah national committee member a ni bawk.