GI tag nei puan humhalh dan tur buaipui mek

Technical Sub-Committee on Inspection Structure for Geographical Indication of Traditional Mizo Puan chuan Mizo puan panga, Mizo ta a ni tih chhinchhiahna Geographical Indication (GI) tag/registration nei tawhte humhalhna tur benchmark an buatsaih mek zel a, Covid-19 léng avangin a hmáwr an la báwk thei rih lo.

Technical Sub-Committee chairman Carol VL MS Dawngkimi, Art & Culture joint director ni bawk chuan Vanglaini palai zawhna chhangin, puan pangate humhalh dan tur chu eng emaw chen an duang tawh tih a sawi a, "Sub-Committee member zingah kum upa tak takte kan awm a, Covid-19 léng avangin member kan inhmukhawm tam thei lo a, kan la final thei rih lo," a ti.

Carol VL MS Dawngkimi chuan, GI tag nei Mizo puante venhim chu an ngaih pawimawh ber a nih thu sawiin, "Mizo puan kaihhnawiha sumdawngte kan hre reng a, an tan kan khirh lutuk kan hlau. Mizo puante originality bo lo leh an tana buaithlak si loa tih dan tur kan zawng tel," a ti a; puante tah dan ziaráng dik nei turin Mizo thil kaihhnawiha mithiamte an râwn nasat thu a sawi.

Mizo thil dangte pawh GI tag nei tura hmalak an duh a, mahse, a awlsam loh thu sawiin Sub-Committee Chairman chuan, "GI tag nei tur hian engtiangin nge kan hnam nen a inzawm tih finfiahna neih a ngai. Kan history-ah a bet em tih leh ziaka awm a ni em tih te, tu ziah leh eng edition nge tihte neih tel a ngai," a ti a; tuna puan panga GI tag neite chu historical document nei a nih thu a sawi a ni.

Tarlan tawh angin, sorkar laipuia Department for Promotion of Industry and Internal Trade (DPIIT) chuan August 16 & 22, 2019 khan Mizo puan panga - Puanchei, Tawlhlohpuan, Pawndum, Ngotekherh leh Hmàrám te chu Mizo ta a ni tih chhinchhiahna GI tag/registration a pe a ni.

GI tag nei Mizo puan pangate humhalh dan tur ngaihtuahtu Sub-Committee-ah hian member-te chu - Boichhingpuii (Chaltlang), Lalhlimpuii (Zarkawt), MISTIC scientific officer Samuel Lalmalsawma, MISTIC patent officer C Lalthanzuala leh Art & Culture-a technical assistant Vanlalhuma Singson te an tel.