MPCC-in Health Minister thlâk an duh ; Sample endikah sorkar a hlawhchham - MPCC

Congress party chuan Mizoram sorkar chu Covid-19 donaa hlawh­­chhamah an puh a, Health minis­ter Dr R Lalthangliana chu a mawh­phurhna hlen zo loah ngaiin châwl tur leh ngaihtuahna thara mipuite hripui dopui thei tur Health minister ruat an duh thu an puang.

MPCC Media department hotute chuan September 4, Inrin­ni khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, Health minister Dr R Lalthangliana chu hripui donaah a hlawhchham chiang hle nia sawiin, "Covid-19 donaa MNF sorkar hlawhchhamnaah hian a mawhphurtu lian ber chu Health Minister a ni. Lungleia RT-PCR dah tur chungchanga tun thlenga harsatna a thlen chhan bul ber pawh amah tho a ni," a ti.

Mizoramin Health minister thar a mamawh thu sawiin Lallian­chhunga chuan, "Health Minister hian theihtawp chu a chhuah ang tih kan ring a, mahse, a theihna leh thiamna hian a tàwp a thleng tawh niin kan ngai. Health Minsiter hi thlak ni se, Health minister tharin ngaihtuahna tharin hripui hi min dopui tawh se kan duh," a ti a; an duh dan chu ngai pawimawh turin Chief Minister a ngen nghal a ni.

Dr Lallianchhunga chuan, Mizoram chu khawvela lockdown puang rei ber a ni chunga hripui vei an tlahniam thei lo chu MNF sorkar hlawhchhamna chiang tak a nih thu a sawi a, "Ministry of Home Affairs (MHA)-in March 21, 2021-a thupek (order) a chhuahah sample test aṭanga 70% emaw, a aia tam chu RT-PCR hmanga test tur a tih laiin, Mizoramah chuan September 2, 2021 thlenga test tawh 8,82,096 aṭanga 66.64% chu test-na rintlak tâwk lo RAT hmanga test a ni," a ti a; sample test-ah Mizoram sorkarin sorkar laipui duh dan a zâwm lo tih a sawi.

Mizoram sorkar chu endikna rintlak tâwk lo RAT-a innghat lui tlatah puhin Lallianchhunga chuan, "Hei hi Mizorama Covid-19 vei tlakhniam theih loh chhanah kan ngai. Sorkarin test-na rintlak ber RT-PCR a bun belh duh miah loh avanga Mizoramin harsatna kan tawh hi a vanduaithlak hle," a ti a; Lunglei aṭanga thlan tlin MNF MLA-te chu Lungleia RT-PCR bun tura sorkar an nawr nat ngam loh avangin demawm an tih thu a sawi bawk.

Dr Lallianchhunga chuan, state tam zawkah Covid-19 vei nasa taka a tlahniam a, hripui darh tur an thunun theih tawh laiin Mizoramah chuan hripui vei zat a tlahniam thei lo tih sawiin, "Hripui donaah Mizoram aia mipuiin sorkar an thlàwp ṭhatna hmun dangah a awm a rinawm loh. Khua/veng zawng zawngah task force din a ni a, mipui thawhkhawm sum hmangin hripui kan do nasa hle," a ti a; sorkar ṭanpuina tel loa din community covid care centre-ah hripui vei 22,573 enkawl an nih tawh thu a sawi.

MPCC Media Chairman chuan, September 4, 2021 thlenga dinhmun angin, Mizorama hripui vei hmuh tawh 62,817 zinga 20,000 vel chu sorkar siam ZMC leh CCC-a enkawl an nih laiin, a tam zawk mi 35,000 vel chu khawtlangin an enkawl leh mahnia inenkawl an nih thu a sawi a, "Sorkar enkawl CCC hi Mizoramah 59 chauh a awm laiin, khawtlang enkawl CCCC chu 240 zet a awm a ni," a ti.