Kolasib dist.-a bank CD ratio 46.07%

February 3, Thawh­lehni khan Kolasib DC conference hall-ah district bawrhsap Sangchhin Chinzah kaihhruaiin District Consultative Com­mittee (DCC), District Level Review Committee (DLRC) leh District Level Security Committee (DLSC)-te an ṭhukhawm a; Kolasib district-a bank hrang hrangte credit deposit (CD) ratio chu 46.07% a ni a, CD ratio tlin tura tuk zat 60% an pha lo.

Sangchhin Chinzah chuan, bank hotute leh line department kal­khawmte chu mipuite rawngbawltu an ni tih hre reng turin a chah a; NABARD buatsaih 'Potential Linked Credit Plans (PLPs) 2020-21 for Kolasib District' a tlangzarh nghal. PLPs 2020-21 chhung hian Kolasib district-a bank-te chuan hmalakna hlawm hrang hrangah cheng nuai 11048.78 sem chhuah turin an ruahman a ni.

Ṭhutkhawmnaa an tarlan danin, December 31, 2019 thlenga Kolasib district-a bank hrang hrangte'n priority sector atana loan an pek chhuah zat chu deposit an hmuh aṭangin 52.28% a ni a, target 40% an khûm.

Meeting chuan, mipui­in bank an dawr kawnga thil ṭul pawimawh hrang hrang an hriat theih nan Financial Literacy Cell kaltlangin Kolasib district-ah inzirtirna kalpui ni se, an ti a; PMEGP diltute'n awlsam zawka project report an siam theih nan project siam sa entawn tur bank hrang hranga târ chhuah te, Kolasib Project Veng leh Bilkhawthlirah ATM booth dah a nih theih nan hmalak mek a nih thute an sawi bawk.