KHAWTHLIR

Thisen pe
September 4, Inrinni khan KṬP, Vaivakawn Branch chuan an kohhran hall-ah Synod Hospital tan thisen unit 45 an pe a, petute mipa 40 leh hmeichhia panga an ni a; ṬKP, Aizawl Central Bialin Aizawl Civil Hospital-ah unit 42 an pe a, petute mipa 31 leh hmeichhia 11 an ni. Inrinni vêk khan Lunglei Pûkpui Bial PYD-in Lunglei Civil Hospital-ah thisen unit 35 pein, petute mipa 33 leh hmeichhia pahnih an ni a; ṬKP, Rahsi Veng Unit aṭangin mipa 18 leh hmeichhia pasarihte'n Christian Hospital tan unit 25 an pe bawk.

Lehkhabu tlangzarh
ICFAI University, Mizorama assistant professor Dr Laltleipuii ziah, 'Mizo ṭawng ri ziarang' tih lehkhabu chu September 4, Inrinni khan Human Resources Development Board vice chairman L Thangmawia, MLA-in Book Cafe, Chanmari, Aizawlah a tlangzarh.

Meizial man

Assam Rifles leh Champhaia Customs department-te chuan September 4, Inrinni khan Chhungte, Champhai district huam chhungah ram dang meizial báwmpui 40 an man a, September 3 khan bawmpui 30 an man bawk. Foreign cigarette an man hi Rs. 91,00,000 mana chhût a ni a, a neitua puh mi pahnih an man tel a ni.

Covid vaccine dose 9,05,268

September 4, Inrinni khan Mizoramah mi 1,253 hnenah Covid-19 vaccine pek a ni a, first dose 743 leh second dose 510 a ni. Inrinni thlenga Mizorama Covid vaccine pek tawh zat chu dose 9,05,268 a ni a, mi 6,58,444 hnenah pek tawh niin, chu'ng zinga 2,46,824 chu la kim tawh an ni.