Ni hnih chhungin Mizoramah Hripui vei mi 1,792 hmuh a ni

Mizoramah Covid-19 vei September 3, Zirtawpni khan mi 825 leh September 4, Inrinni khan mi 967 hmuh chhuah a ni a; hmarchhak state zingah hripui vei ni khata hmuh tamna ber a ni zui zel. Inrinni leh nimin khan hripui vei dam tawh mi 1,163 chhuahtir an ni a; Zirtawpni zan aṭanga nimin tlai thleng khan hripui vei mi pathum an thi.

Covid-19 vei Sep-tember 3-a hmuhte chu ZMC laboratory-a hmuh chhuah 113, TrueNAT hmanga hmuh 50, RAT hmanga hmuh 642 leh Fluorescent Immunoassay (FIA) hmanga hmuh 20 an ni a; mipa 396 leh hmeichhia 429 an ni.

Inrinnia hripui vei hmuh chhuah 967-te chu mipa 483 leh hmeichhia 484 an ni a; ZMC-a hmuh chhuah 218, TrueNAT hmanga hmuh 55, RAT hmanga hmuh 683 leh FIA hmanga hmuh chhuah 11 an ni. IDSP record angin, Mizoramah Covid-19 vei 63,784 hmuh chhuah a ni tawh a, mipa 32,460 leh hmeichhia 31,324 an ni. Nimin tlai dar 5 thleng khan mi 53,243 (83.47%) chhuahtir an ni tawh a, mi 223 (0.35%) thi tawhin, enkawl mek mi 10,318 (16.18%) an awm.

September 3, Zir­tawpnia Covid-19 vei hmuh chhuah dan chu - ZMC laboratory-ah Aizawl leh Serchhip district-a sample 1,034 endik aṭangin mi 113, FIA hmanga Aizawla sample 109 endik aṭangin mi 20, TrueNAT hmangin district 10-a sample 353 endik aṭangin mi 50 leh RAT hmanga district 11-a sample 7,587 endik aṭangin 642 a ni. TrueNAT hmangin Aizawlah pahnih, Lungleiah pakhat, Champhaiah pakua, Lawngtlaiah 18, Mamitah 13, Saitualah pahnih leh Khawzawlah panga hmuh chhuah a ni a; RAT hmangin Aizawl district-ah 278, Lawngtlai district-ah 71, Lunglei district-ah 67, Champhaiah 50, Siahaah 44, Kolasib district-ah 42, Mamit district-ah 35, Serchhipah 28, Khawzawlah 27, Hnahthialah panga leh Saitualah pahnih hmuh a ni bawk.

Zirtawpnia sample endik zawng zawng chu 9,083 niin, chuta ṭanga hripui vei hmuh chhuah 825 chu 9.08% a ni a; ZMC-ah 10.93%, TrueNAT-ah 14.16%, RAT-ah 8.46% leh FIA-ah 18.35% a ni. September 3-a Covid-19 vei hmuh chhuah­te chu symptom nei 523 leh nei lo 302 an ni a; tualchhunga kái 816 leh state pawn aṭanga lut pakua niin, tualchhunga kái zingah kàina chin hriat loh 361 an awm.

September 4, Inrinnia Covid-19 vei hmuh chhuah dan chu - ZMC laboratory-ah Aizawl district-a sample 1,379 endik aṭangin mi 218, FIA hmanga Aizawla sample 81 endik aṭangin mi 11, TrueNAT hmangin district 10-a sample 432 endik aṭangin mi 55 leh RAT hmanga district 11-a sample 5,641 endik aṭangin 683 a ni.

TrueNAT hmangin Lawngtlaiah mi 32, Champhaiah pariat, Mamit leh Khawzawlah pali ve ve, Lungleiah pathum, Siaha leh Serchhipah mi pahnih ve ve hmuh a ni a; RAT hmangin Aizawl district-ah 290, Kolasib district-ah 117, Mamit district-ah 59, Lawngtlaiah 54, Siahaah 44, Lunglei district-ah 41, Champhaiah 40, Serchhipah 24, Khaw­zawlah 11 leh Saitualah pakhat hmuh a ni bawk.

Inrinnia sample endik zawng zawng chu 7,533 niin, chuta ṭanga hripui vei hmuh chhuah 967 chu 12.84% a ni a; ZMC-ah 15.81%, TrueNAT-ah 12.84%, RAT-ah 12.11% leh FIA-ah 13.60% a ni. September 4-a Covid-19 vei hmuh chhuahte chu symptom nei 465 leh nei lo 502 an ni a; tualchhunga kái 951 leh state pawn aṭanga lut 16 niin, tualchhunga kái zingah kàina chin hriat loh 401 an awm.

September thla ni li chhungin Covid-19 positive mi 3,784 hmuh chhuah a ni tawh a, chawhrualin, ni tin mi 946 hmuh chhuah an awm ang a tling. Covid-19 vei hmuh tawh zat 63,784 chu kum 2011 chhiarpui angin, Mizorama mi 1,000 zelah hripui vei mi 58 an awm ang a ni.

Nimin khan tlai dar 5 thlengin hripui vei dam tawh mi 662 chu chhuahtir an ni a; Aizawl district-ah mi 439, Kolasib district-ah 99, Mamit district-ah 54, Lawngtlai district-ah 51, Champhai district-ah 14, Serchhip district-ah pathum leh Lunglei leh Saitual district-ah mi pakhat ve ve an chhuak. Inrinni khan mi 501 chhuahtir an lo ni tawh bawk.