Covid-19 vangin mi 223 thi tawh

September 3, Zirtawpni zan aṭanga nimin tlai dar 5 thleng khan Mizoramah Covid-19 vei mi pathum an thi. Sorkar chhinchhiah angin, Mizoramah Covid-19 vangin mi 223 an thi tawh.

R Zochhuaki (87), Ramhlun North chu September 3, Zirtawpni zan dar 7:30 khan Nazaret Hospital-ah a thi a, a thih zan hian vui a ni. Amah hi damlo inenkawl lai a ni a, inentir tura damdawi-in panpui a nih hnuah a thi a; a thih hnua a swab sample endiknaah Covid-19 positive a ni tih hmuh chhuah a ni.

Covid-19 vei State Referral Hospital-a enkawl lai Khawvelthangi (81) w/o L khumtira, Kolasib Venglai chu September 4, Inrinni zing dar 8:30 khan a thi a, Inrinni tlai khan vui a ni. Amah hi Alzeimer nei, kum hnih vel che chhuak thei tawh lo a ni a; Covid-19 vei a ni tih August 11, 2021 khan hmuh chhuah niin, August 17 aṭangin SRH-ZMC-ah enkawl a ni.

Nimin chawhma dar 10 khan Zothansanga (39), Khawzawl Vengthar chu Covid-19 vangin SRH-ZMC-ah a thi a, hripui vanga Mizorama thi 223-na niin, nimin khan vui a ni. Khawzawla sorkar hotute hnen aṭanga thu dawn danin, Zothansanga hi 2nd IR battalion, Khawzawla awm a ni a, Vairengte lama ramri vénga an duty laiin August 31, 2021 khan Covid-19 positive a ni tih hmuh chhuah niin, hmuh chhuah a nih ní hian SRH-ah dah luh nghal a ni.