Assam police-in Phainuam mi 4 an man ; September 4 khan Silchar-ah hruai an ni

Assam police-te chuan September 2, 2021 khan Phainuam mi pali an man a, an man zing pathum chu September 4, Inrinni khan Silchar jail-a dah turin an hruai. Pakhat erawh kum tling lo a nih avangin Juvenile Justice Board (JJB)-ah an thawn thung.

Phainuam aṭanga thu dawn danin, Assam police-in an mante chu puitling pathum, kum 30 - 45 inkar leh naupang kum 14 mi, mipa vek an ni a; September 2 khan Phainuam aṭanga km. 3 vela hlá, Assam lam luah chinah châkkhai lam leh vawkchaw sat turin an kal a, tlai dar 3:30 velah Assam police-in an man a ni.

Puitling pathumte lakah Dholai Police Station-ah Assam Excise Act, 2018 hmangin thubuai ziah luh a ni a, kum tling lo erawh JJB-ah thawn a ni thung. Puitling pathumte chu bail tuma hmalak a nih thu an sawi.

September 4, Inrinnia Phainuam VC leh tlawmngai pawlte ṭhukhawm chuan, an khaw mi Assam police-te'n an man ngawt chu ṭha lo an ti a, "A rang thei ang bera chhuah kan phût tlat a ni. An rawn chhuah loh chuan hmalak zel dan tur ngaihtuah a ni ang. Kan naute an rawn chhuah hma chu Phainuam huam chhunga hnam dangte Phainuam chhuahsan phal a ni lo a, Assam aṭanga hnam dang lo luh pawh phal a ni lo," an ti.

Phainuam VC leh tlawmngai pawlte chuan tunlai boruak avangin Mizote chu state páwna kal lo turin an ngen a, kal lui an awm a, harsatna an tâwk a nih chuan khawtlang hruaitute'n mawh an phurh loh tur thu an tarlang a ni.