Cabinet-in Covid-19 an sawiho Sorkarin a ṭul ang zelin sum a ruahman - CM

Council of Ministers chu nimin khan Chief Minister's Office (CMO)-a Cabinet room-ah chief minister Zoramthanga hoin an ṭhu a, Coronavirus (Covid-19) chungchanga sorkar hmalaknate thlirin, ṭan lak zel dan tur an sawiho. Chief Minister chuan, mipui himna turin Covid-19 kaihhnawihah sorkarin a ṭul ang zelin sum leh pai mamawh a ruahman tih a sawi.

Health minister Dr R Lalthang­liana chuan, Covid-19 kai leh kai loh enfiahna (test kit) chu buaipui chhung a rei ṭhin avangin neih nghal mai theih ni lo mah se theihtawp chhuah mek a nih thu a sawi a, "Khawsik enna (thermal scanner) chah belh a ni a, market-ah lei tur a tlém tawh chungin tun dinhmuna indaih lohna phuhru thei tur khawp chah a ni," a ti.

Council of Ministers ṭhut­khawm­ah hian, mipui himna tura sorkarin zirna-inte a khâr chu chawlh satliah emaw tia chhuakvâk tam tak an la awm tih hriat a nih thu te, chu chu thil pawi tak thlen thei a nih thu te, châkkhai lam tur leh thil ṭul bikah lo chuan mahni ina awm tam lehzual a ṭul thute a sawi a; Mizoram State Museum chu khâr ve turin an rél.

Sorkar hotute chuan, ramri hrang hrang khâr rih a nih dan leh ramria endikna kalpui dante an sawiho a; Bangladesh nena inrina chu khâr a nih tawh thu an sawi. Ramria screening titute'n hmanrua an mamawh belh thu te, thermal scanner pek belh an nih bakah, laptop ruahman a nih thute an sawi a, "A remchan dan angin a nghet loa thawktu (temporary employee) lak belh theih ni se," an ti.

Tlawmngai pawlte nena ṭan tlan a ṭul thu sawi a ni a; sorkar pisa hrang hrangah kut silna siam a ni chu lawmawm an ti a, sorkar hnathawkte chu fimkhur zui zel turin an chah. Sorkar thuchhuah tarlan danin, Zokhawthar leh Lengpui Tourist Lodge chu isolation facility atan buatsaih a ni tawh a; state leh district level-ah task force din a ni tawh. Local council leh village council kaihhruaina hnuaiah veng/khaw tina NGO leh kohhrante telna task force din tura tih a ni bawk.

Nimin thleng khan mi 46,038 enfiah (screening) an ni tawh a, chu'ng zinga mi 4,296 chu nimin bika en an ni. Mahni ina khung hran (home quarantine) tawh mi 164 awmin, chu'ng zinga pakhat chu nimin aṭanga khung hran a ni a; sample test tura thawn mi 10 awm tawhin, result hriat tawh chinah Covid-19 kai an la awm lo.