Rawmi chi supply fel a ni tawh ; Firm pathumin an in-supply ṭawm

Horticulture department hnuaiah Rawmi (Dendrocalamus Sikkimensis) supply fel a ni tawh a, firm pathumin an in-supply ṭawm. Rawmi supply tur zawnna atan hian May 7, 2021 khan tender chhuah a ni.

Vanglaini palaiin Horticulture dept. aṭanga thu a dawn danin, Rawmi chi hi firm pathum - Mizoram Bamboo Producer (Secondary Hardening Unit, Growmore Biotech), IMCS Nursery Firm leh Bairabi Bam­boo Producer-te'n an in-supply ṭawm.

Rawmi chi hi Socio Economic Develop-ment Policy (SEDP) hnuai­ah 15,000 leh National Bamboo Mission (NBM) hnuaiah 25,000, a vaiin 40,000 supply a ni.

Rawmi chi tender hi firm paliin an chhang a, firm pakhat chu an sample thehluh a dik loh avangin hnawl a ni. A bak firm dang pathumte chuan ṭiak khat Rs. 85-a supply turin an chhang a, an chhanna zat hi a inang ṭhap a ni.

Heng firm pathumte hi Rawmi chi supply tura thlan vek niin, an chhanna aia tlawm­in ṭiak khat Rs. 70-a supply tir an ni thung a; rawmi chi atan hian cheng nuai 28 sen a ni.

Tarlan tawh angin, eptu party-te chuan Covid-19 avanga sum harsat laia Rawmi supply-tu tur zawn chu a hun loah an ngai a, tender chhuah tawh pawh sût (cancel) ni se an duh thu an lo tarlang tawh a ni.

Horticulture department hian June 3, 2020 khan mau/raw ṭiak supply-na tur tender a lo chhuah tawh a, chumi ṭum chuan Dendrocalamus Brandisi leh Dendrocalamus Latiflorus ṭiak supply-tu tur zawn a ni. Tender chu chhángtu pakhat chiah a awm a, chhángtu awm chhun Growmore Biotech chu supply-tir a ni.

Dendrocalamus Brandisi leh Dendro­calamus Latiflorus ṭiak supply tura thlan Growmore Biotech hian an authorised distri­butor F Lalhriatpuii, Ramhlun South hmingin an chháng a; F Lalhriatpuii hi Rawmi supply tender chhángtu zinga mi, Mizoram Bamboo Producer neitu a ni. Growmore Biotech Ltd., Tamil Nadu director chu Dr N Barathi a ni.

Hetihlai hian Horticulture depart­ment chuan, May 19, 2021 khan thuchhuah siamin, thei leh thlai dang angin Rawmi chu hunbi nei a nih thu an tarlang a, "Tun hnaiah Rawmi hi Mizoramah a tám tih hriat a nih avangin Mizoram tualṭo ngei raw ṭha chìn pun a nih a, hman ṭangkai a nih theih nan hmalak a ni," a ti.

Horticulture depart­ment tarlan danin, depart­ment programme awm sa aṭangin Rawmi chìnna tur ram chu buatsaiha vah fai vek tawh a ni a; kut hnathawktute inrua­hmanna thlawn lohna turin a hun taka raw ṭiak phuntir chu tihmâkmawhah an ngai a ni.