MLA-te'n Andrew H Thangliana an ral

August 17, 2021 a boral ta, Tuirial bialtu MLA Andrew H Thangliana chu nimin khan Mizoram Legislative Assembly speaker Lalrinliana Sailo kaih­hruaiin MLA rualte'n a chenna in, Chawlhhmun, Aizawlah an ral.

Ralna hunah hian Lawngtlai West bialtu MLA C Ngunlianchunga chuan hunserh a hmang a, Home minister Lalchamliana’n kalkhawmte aiawhin thu a sawi a ni.

Lalchamliana chuan Andrew H Thangliana chu dikna ṭan tlattu nia a hmuh thu sawiin,"Kum naupang tein MLA candidate a nih vawi khatnaah bial mipuite'n duh takin an thlang tling nghal a, a bial mipuite leh ram pawhin a la mamawh em em laia mual a liam ta mai hi a pawi takzet," a ti a, a awm dan leh thusawite a lo chik ṭhin thu leh, ram rawngbawlna hna thawk rei hman loa a liam boral chu mimal taka a ui thu a sawi.

ZPM MLA Lalduhoma pawhin thu sawiin, Andrew H Thangliana chuan a bial mipuite tan theihtawp a chhuah tih a sawia,"Hma nasa takin a sawn a, hmabak êng tak a neih mek laia a hun tawp a hmang ta mai hi ka ui takzet. A bial a enkawlnaah mit a tlung a, hnathawh chhunzawm tur tam tak a hnutchhiah a ni," a ti.

Kolasib district-a MLA zinga mi K Lalrinliana chuan Andrew H Thangliana chu Kolasib district mipuiin an ui thu leh, a nungchang leh thiltihah tihtaktakna nei mi nia a hriat thu a sawi.

Mizoram Legislative Assembly secretary H Lalrinawma chuan Andrew H Thangliana chhungte hnenah Mizoram Legislative Assembly aiawhin ralna sum Rs. 15,00,000 a hlan a ni.