KHAWTHLIR

Thawhhona thuthlung
Mizoram Youth Commission (MYC) leh Serampore College, West Bengal-te chuan nimin khan ṭhalaite chawikanna tur kawngah thawhhona thuthlung an ziak a; thuthlungah hian MYC chairman Dr Vanlalṭanpuia, MLA leh Serampore College principal Dr Vansanglura, CEO ni bawkte'n hming an ziak a ni. Thawhhona hmang hian Serampore College chuan khawvel hmun hrang hrangah thawhpui an neihte chu Mizo ṭhalaite'n hlawk taka an hman theih nan hma an la dawn a ni.

Punkhawm khap
Aizawl district sub-divisional magistrate Lalvenhima chuan, vawiin aṭanga Assembly Session neih ṭan turah dak-inpui aṭanga Governor chenna in chhim leh hmar gate leh Tennis Court inkarah mi panga aia tam punkhawm a khap. Khapna thupek hian September 9, 2021 thleng a huam ang.

Covid vangin thi
SRH-ZMC a Covid-19 hri kai enkawl lai Hranga Kawlni (79), Mualcheng chu nimin zing dar 2:35 khan a thi a, Mizorama hri vanga thi 224-na a ni. Hranga Kawlni hi August 21 khan hri a kai tih hmuhchhuah a ni a, August 22-ah SRH-ZMC ah admit a ni. Vanlalsiammawia (62), Hnahthial Kanan Veng pawh nimin tlai dar 4:30 khan SRH-ZMC ah Covid-19 vangin a thi. August 21 khan hri a kai tih hriat a ni a, September 3, 2021 khan ZMC-ah dahluh a ni.

Photo Exhibition
India ramin zalenna a hmuh kum 75-na puala IPR department-in Photo Exhibition a buatsaih chu nimin khan IPR director Lallianpuii'n Aizawl Art Gallery-ah a hawng a; sorkar inkaihhruaina zawm chunga chhim turin mipui a sawm. Photo Exhibition hi ni nga chhung awh tur a ni a, thlalak 63 - Mahatma Gandhi thlalak 16, Subhash Chandra Bose thlalak 10, Sardar Vallabhbhai Patel thlalak 13 leh IPR department leh Mizoram Photographers’ Society (MPS) ṭangkawpin Covid-19 puala photo competition an buatsaiha thlalak ṭha zual 24 pho chhuah a ni.