ZMC-a naupang ICU atan Central-in vbc. 2.77 a pe tawh

State Referral Hospital (ZMC)-ah Covid-19 vei naupang damlote enkawlna tur Neo-natal Intensive Care Unit (NICU) leh Pediatric Intensive Care Unit (PICU)-a hman tur bungraw lei nan sorkar laipuiin cheng vbc. 2.77 sanction order a tichhuak tawh. NICU leh PICU hman theih hun tur erawh hriat a ni lo.

SRH-ZMC hotute chuan Vanglaini palai zawhna chhângin, SRH-a Covid-19 vei naupangte enkawlna tur ICU bungraw lei nan sorkar laipuiin tun hnaiah sanction order a tihchhuah thu an sawi a, "Cheng vbc 2.77 sanction order kan dawng tawh a, naupang ICU-a damlote enkawlna tur bungraw mamawh hrang hrang lei nan tender chhuah a ni ang," an ti.

ZMC-ah hian naupang damlote enkawlna tur ICU hmun buatsaih peih thawkhat a ni tawh a, building leh khum vel chu hman theih tura peih thawkhat a ni tawh a, damlote enkawlna tur khawl lei a la ngai. NICU-ah khum 25 leh PICU-ah khum 10 a awm dawn a, a taka hman theih hun tur hriat erawh a la ni lo.

Covid-19 vei naupangte chu ward pangngaiah enkawl rih an nih thu sawiin ZMC hotute chuan, "ZMC-a nau piang hlim, an nute hripui la veite chu khum pali vel awmna naupang ICU kan neihsaah kan enkawl nghal ṭhin. A bak naupang dangte chu an chhungte'n Covid ward-ah an awmpui a, naupang lian deuh tawh leh buaipui ngai lutuk lote chu anmahniin ward-ah an awm," an ti.

ZMC hotute chuan, NICU leh PICU-te hman theih hun tur hriat theih a nih loh thu an sawi a, "Sanction order chhuak tawh mahse tender-te chhuah a la ngaih dawn bakah, bungrua hi phaia mi lei tur a ni a, bungrua chah chhuah leh install chhung nen engtianga rei nge hun a duh dawn a sawi theih loh," an ti.