CYMA leh Fisheries dept.-in thawhhona ziak

Mizorama luidung nungchate ṭha zawk leh awmze nei zawka humhalh a nih theih nan, nimin khan Fisheries department leh Central YMA chuan Fisheries minister K Lalrinliana pisaah kum hnih chhung thawhhona thuthlung an ziak.

Thawhhona thuthlungah hian Fisheries department aiawhin director F Vanlallawma leh CYMA aiawhin president Vanlalruata-te'n hming an ziak a; hriatpuitu (witness)-ah Fisheries joint director Laltleipuii leh CYMA general secretary Prof. Lalnuntluangate'n an ziak thung.

K Lalrinliana chuan kum tam tak chhung YMA leh khawtlangin lui dung humhalh hna an thawh thu sawiin,"Vawiin thlengin an kalpuia, heng lui humhalh leh a chhunga chengte venhim hna thawk tur hian Fisheries department-a thawk mi 188-te pawhin an phak tawkin an kalpui ve reng a ni," a ti a, venhim leh thil dang atan work force mamawhna a nasat avangin sorkar chuan YMA chu thawhhona thuthlung a ziahpui ta tih a sawi.

The Mizoram Fisheries (Amendment) Act, 2016, The Mizoram Fisheries Rules, 2019 leh The Fisheries Conservator Reward Scheme 2019 huam chhunga thawhhona chu ram ei leh bar intodelh kawnga sulsutu a nih theih thu sawiin Fisheries Minister chuan,"Hun bi nei leh dan leh hrai kalphung mumal taka luidung nungchate kan enkawl chuan mimal leh sorkar pawhin hlawkna a nei dawn a ni," a ti.

Fisheries department leh CYMA thawhhona hi The Mizoram Fisheries (Amendment) Act, 2016; The Mizoram Fisheries Rules, 2019 leh The Fisheries Conservator Reward Scheme 2019 behchhana siam a ni.