RT-PCR khawl bun phûtin Lunglei 'S' MLA inah banner tar

Lunglawn, Lunglei Ṭhalaite chuan Lungleia RT-PCR bun ngei an duhzia lantirna atan an bialtu MLA (Lunglei South) Dr K Pachhungate in bangah banner an tar.

Lunglawn Ṭhalai chuan thuchhuah siamin, hripuiin an veng mai ni loa, a bikin chhim bial mipuite a nuai thu tarlangin, "RAT khawl hmanga result dik lo awm fote hian khawl dang kan mamawh a ni tih a tichiang a ni. Tin, RTPCR khawl hi Lungleia bun ngei a nih theihna atan Bialtu MLA zahawm tak hian hma min lakpui se tiin pangchang takin kan ngen a ni," an ti.

An Bialtu MLA in hnuai building-a an banner tar party pakhat hruaitute'n an lak thlâksak nia tarlangin Lunglei Ṭhalai chuan, "Pangchang taka kan 'pa' kan bêl hi kan tisual em ni kan ti a ni?" a ti a, Gauhati High Court, Aizawl Bench thu anga a rang thei ang bera Lungleia RT-PCR bun a nih theihna atana hmalaksak turin an Bialtu MLA an ngen.

Party inbeihna leh mimal inbeihna a awm lo a, mipuite ṭap leh lungngaite hmakhua atan leh chhim mipuite tana ding an nih thu tarlangin Lunglawn Ṭhalaite chuan, "Kan hmalaknaah hian min tibuaia he khawtlang mamawhna hre loa min vau titihtu an awm fo hi pawi kan ti a, nâ kan ti hle," an ti.