ASF vangin vawk 26,118 thi tawh

Vawk pùl hri, African Swine Fever (ASF) avangin nimin thleng khan Mizoramah vawk 26,118 a thi tawh a, khua/veng 237-ah a lêng tih finfiah a ni tawh. ASF vang hian nimin thleng khan vawk 9,689 suat (culled) a ni tawh bawk.

Nimin khan ASF hri kai vawk 93 a thi a, vawk 17 suat a ni a, ASF infected area a puan ni lo khau/veng paliah vawk 12 a thi.

Animal Husbandry & Veterinary department-in report an dawn chinah, ASF vanga Mizorama vawk 26,118 a thih tawh laiin, ASF lènna (infected area)-ahte vawk dam lai 44,690 a la awm a; nimin thleng khan ASF infected area-a puan ni lo khua/veng 110-ah chhan hriat loha vawk thi 1,099 a awm tawh.

Aizawl district chu ASF infected area leh ASF vanga vawk thi tamna ber a la ni zel a, Mizoram puma infected area zinga 45.14% chu Aizawl district-a mi a nih bakah, nimin thlenga Mizorama ASF vanga vawk thi zawng zawng zinga 42.53% chu Aizawl district-a mi a ni.

AH&Vety department hriatpuinain ASF infected area 237 zinga 103-ah vawk 9,689 suat a ni tawh a; Mizorama vawk suat tamna ber Mamit district-ah nimin thleng khan ASF infected area 26 zinga pariatah vawk 2,846 suat a ni tawh. Mizorama ASF vanga vawk suat tawh aṭanga 29.37% a ni.

Mizorama ASF infected area ni lo khua/veng 13-ah ASF hri kai nia rinhlelh vawk 316 suat a ni tawh a, Aizawl district-a Selesihah ASF hri kai nia rinhlelh vawk suat tam berin nimin thleng khan vawk 135 suat a ni.

Chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin AH&Vety department chuan mipui an ngen.