Covid-19 donaah CM leh Health Minister-in dawhkan khat kil rawh se- ZPM

ZPM councillor-te chuan nimin khan ZPM general secretary Phairothanga hoin Mualpui, Salem Venga Covid Dedicated Hospital (CDH) atana ruahman mek an tlawh a, hmalakna ṭha tawk loah an ngai a, Chief Minister leh Health Minister chu dawhkan khat kila hripui do dan ngaihtuah turin an phût.

ZPM chuan thuchhuah siamin, "Covid-19 enkawlna hmun buatsaihna kawnga sorkar hmalaknate a vuaicha hleah kan ngai. August 6, 2021 khan Aizawl South - II MLA Pu Lalchhuanthanga leh ZPM Gen. Hqrs. hruaituten kan lo tlawh tawh a ni. Khum 110 awm theihna tur Salem Venga mi, peih hnaivai ber tur anga lang chu thla khat hnuah pawh an pamṭul titih niin alang hial," an ti.

Covid-19 do danah rawtna leh thurawn vawi tam tak an siam tawh thu tarlangin ZPM chuan, "Khawvel tibuaitu a nih avangin hming ṭhat lakna ringawt ngaihtuah loa theihtawpa do tur te, budget siamṭhat a ṭul thu te leh thawktu indaih lohna phuhruk a ngaih thute kan sawi tawh ṭhin," an ti a, ZPM Leader-in RT-PCR khawl leina thawh a inhuam thute pawh a thlen tawh thu an sawi.

ZPM chuan mipui vang tala Chief Minister leh Health Minister-in dawhkan khat kilin hma la se an duhthu tarlangin, "Hripui hi sawi fel mai theih ni loin tihtakzeta do ngai a nih avangin kan rawtna leh thurawnte an pawm duh lo a nih pawhin mipui tawrhna avang tal pawhin dawhkan khat kilin hma la dun turin kan ngen tak meuh a ni," an ti.