Vawk pûl hri leng meka inrawlh turin Dr K Beichhua'n central sorkar a ngen

Fisheries, Animal Husbandry and Dairying minister Parshottam Khodabhai Rupala hoin nimin khan National Level Virtual Review Meeting neih a ni a, AH & Vety minister Dr K Beichhua chuan Mizorama African Swine Fever (ASF) leng mekah central sorkar an inrawlh a ṭul thu a sawi.

Dr K Beichhua chuan kum 2013, 2016 leh 2018-ah Mizoramah vawkpul hri PRRS a leng tih sawiin, "Department-in theihtawp a chhuah hnuah khuahkhirh a ni tawh. Tunah hian a aia hlauhawm zawk, vawkpul hri ASF-in Mizoram a run mek a ni. He hrileng hi Mizoram mai chuan a khuahkhirh thei lo. He hrileng hi Mizoram issue chauh ni loin India rampum issue a nih avangin central sorkar a inrawlh a ngai takzet," a ti.

Tun hnaia Delhi-a Union Secretary a hmuh ṭuma Mobile Veterinary Unit atana proposal an thehluh a hlawhtlin ngei a duhthu meeting-ah hian AH & Vety Minister chuan sawilang lehin, "Mizoram hi tlangram tlawhpawh harsa a nih avangin ran natna khuahkhirh zung zung turin Mobile Veterinary Unit kan mamawhna hi a sang hle," a ti a, proposal an thehluh dangte pawh a bik taka ngaihtuahsak turin a ngen.

AH & Vety Minister tarlan danin, ASF vangin Mizoramah vawk 26,025 a thi tawh a, heng bakah hian vawk 10,000 chuang sorkar hriatpuinaa suat tawh niin, vawk 48,000 chuang he natna kai rinhlelh an la awm.

Meeting-ah hian Fisheries, Animal Husbandry & Dairying secretary Atul Chaturvedi chuan an department scheme leh hmalaknate tarlangin, joint secretary (cattle & dairying) Varsha Joshi leh joint secretary (National Livestock Mission) Dr OP Chaudhary-ten kum 2021-2026 chhunga scheme thar an kalpui turte a lem nen an tarlang thung.