Covid-19 vangin New Market khâr tum lo MC luhkâ tinah kut silna dah vek a ni

Ram hrang hranga Covid-19 léng vangin Aizawl New Market khâr tumna a awm anga thuthang chu thu belhchian dâwl lo a nih thu marketing inspector Mal­sawmdawngliana chuan Vanglaini a hrilh. Hetih lai hian, Millennium Centre (MC)-ah chuan a chhunga lut turte hman turin luhka tinah kut silna (hand sanitizer) chhawp vek a ni.

Marketing inspector Mal­sawm­­dawngliana chuan, New Market khâr chungchangah sorkar aṭangin thuchhuak a awm loh thu sawiin, "Mipui ni tin mamawh ei leh in awmna a ni a, khâr loin tihthianghlimna lamah ṭan kan la dawn," a ti a; ṭan an lak dan sawiin, "Sweeper 18-te hnenah hand sanitizer, sahbawn, kutkawr leh hmai tuamnate kan pe a, dawrkaite pawh an thil zawrh ei nghal mai theih tura an buatsaih ang chite ti tam lo turin kan hrilh," a ti.

Malsawmdawngliana chuan, seat nei lo chunga bazar area-a ṭhute chu fimkhur thilah ṭhuttir loh dan leh hmun remchang laiah mipui tan kut silna hmun siam dan tur an ngaihtuah mek thu sawiin, "Kan duh danah chuan mipui leh dawrkaite hian mask hmang vek thei se a him leh zual ang," a ti. New Market-a thil zuarte chuan, tunlai hi New Market a lun loh hun lai tak a nih tho rualin, kum dangah tun ang hun aiin mipui an tlem thu an sawi.

Chawhmeh zuarte chuan, nimin bikah mipui an tam thu sawiin, "New Market khâr chungchanga thuthang dik lo awm vanga inlei khâwl tum an nih kan ring," an ti. Secondhand lane leh thawm-hnaw zawrhnate chu a reh hle a, thawmhnaw zuarte chuan ni dang aiin an inhralh tlem thu Vanglaini palai an hrilh. 

Dawrkai ṭhenkhat chuan New Market area-ah thuthang hrang hrang avangin an awm a nawm loh ṭhin thu sawiin, "Mipui ­nen kan indawrnaah fimkhur a ngai si a, invènna mumal kan nei bawk si lo," an ti a; dawrkaite leh mipui tan sorkarin invenna tur rua­hmanna ṭha tak siam se an duh thu an sawi.

Millennium Centre manager R Lalnunpuia chuan, coronavirus vangin MC an enkawlnaah ruahmanna hrang hrang an siam thu sawiin, "Luhká zawng zawngah vawiin (March 18) aṭangin MC-a lut tur mipui hman turin hand sanitizer kan dah vek. Mask nei lo, hritlang chung­a rawn lut an awm chuan security point hnai berah surgical mask a thlawna an lak tur kan chhawp bawk," a ti.

R Lalnunpuia chuan, inthiarna zawng zawngah sahbawn ṭha chi an dah vek thu leh, WHO-in invenna tura kaihhruaina a siamte chu MC chhung hmun hrang hrangah an târ dawn thu a sawi a; tun hmaa MC chhunga hmai tuam an phal loh ṭhin chu hri leng boruak vanga an phal rih thu sawiin, "Rûkru tamna a nih avangin security-te chu fimkhur lehzual turin kan ti a, boruak a ziaawm hunah kan khap leh nghal ang," a ti.

MC Manager chuan, hmun phiattute hnenah mask leh rectified spirit spray dispenser an pek vek thu leh, mipuiin an kuta an khawih tam deuh hmunte chu tifai uluk leh zual tura an inhrilh thu a sawi a; MC-a dawrkaite chuan ṭum dang aiin mipui veivâk an tlem thu leh inhralh a harsat thu an sawi bawk.