COVID-19: Mizoram dinhmun ; Hripui vei 444 hmuh belh a ni

September 5, Pathianni khan Mizoramah Covid-19 vei mi 444 hmuh chhuah a ni a; a záwnin ni 14 chhung hmarchhak state zingah hripui vei ni khata hmuh tamna ber a ni. Nimin khan hripui vei dam tawh mi 415 chhuahtir an ni a, nimin tlai dar 5 thleng khan hripui vei mi pahnih an thi.

Covid-19 vei September 5-a hmuhte chu TrueNAT-PCR hmanga hmuh chhuah pakua, FIA (Fluorescent Immunoassay) hmanga hmuh chhuah 19 leh Rapid Antigen Test hmanga hmuh chhuah 416 an ni. ZMC laboratory hmangin swab sample endik a ni lo.

Hripui vei hmuh chhuah thar mi 444-te chu symptoms nei 309 (69.59%), symptoms nei lo 110 (24.77%) leh damlo dinhmun report loh 25 (5.63%) a awm a; tualchhunga kái 441 leh state pawn aṭanga lut pathum niin, tualchhunga kái zingah kàina chin hriat loh 234 an awm.

IDSP record angin, Mizoramah Covid-19 vei 64,228 hmuh chhuah a ni tawh a, mipa 32,661 leh hmeichhia 31,567 an ni. Nimin tlai dar 5 thleng khan mi 53,881 (83.89%) chhuahtir an ni tawh a, mi 225 (0.35%) thi tawhin, enkawl mek mi 10,122 (15.75%) an awm.

September 5, Pathiannia sample endik dan chu - TrueNAT hmangin Kolaaib, Mamit leh Khawzawl district-ah 172, RAT hmangin district pakuaah 1,822 leh Fluorescent Immunoassay (FIA) hmangin 56 a ni a, a vaiin sample 2,060 a ni. Sample endik a?anga hripui vei hmuh chhuah 444 chu 21.66% a ni a; TrueNAT-ah 5.23%, RAT-ah 22.83% leh FIA-ah 33.93% a ni.

District tina Covid-19 vei hmuh chhuah dan chu - Aizawlah mi 344, Mamitah 52, Lungleiah 26, Siahaah pariat, Serchhipah panga, Lawngtlaiah pali, Kolasib leh Khawzawlah pahnih ve ve leh Saitualah pakhat a ni. Mizorama Covid-19 vei hmuh tawh zat 64,228 chu kum 2011 chhiarpui angin, Mizorama mi 1,000 zelah hripui vei mi 58 an awm ang a ni.

Nimin khan tlai dar 5 thlengin hripui laka fihlim tawh mi 415 chhuahtir an ni a; Mamit district-ah mi 148, Kolasib district-ah 139, Lawngtlai district-ah 36, Aizawl leh Champhai district-ah 24 ve ve, Khawzawl district-ah 18, Lunglei district-ah 12, Serchhip district-ah pariat, Hnahthial district-ah pali leh Saitual district-ah pahnih an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 14,379 hmuh chhuah a ni tawh a, TrueNAT-PCR hmangin 3,686, RAT hmangin 46,045, FIA hmangin 114 leh Guwahati-ah pakhat hmuh chhuah a ni tawh.

IDSP tarlan danin, September 5, 2021 thlengin Mizoramah swab sample 9,07,254 endik a ni tawh a, chu'ng aṭanga Covid-19 vei hmuh tawh zat 64,228 chu 7.08% a ni. Hripui vei hmuh tawh zinga mi 59,849 chu Mizoram chhunga kái chhâwng an ni a, mi 4,379 chu Mizoram páwn aṭanga an rawn luh hnua hmuh chhuah an ni.