Chassad khaw ṭanpuina hlân

March 16, 2020-a NSCM-IM leh Tangkhul Naga nia hriatte'n Manipur-a Zo hnahthlak Kukite chenna Chassad khua an hâl vanga chenna in nei lote tan MPCC president Lal Thanhawla leh MPYCC president Dr Lalmalsawma Nghakate chuan buhfai, dailuah, chini leh bekangsa (neutrela) 407 truck phur khat an pe.

Thilpek hi Dr Lalmalsawma chuan Manipur Group YMA hnenah a hlan a, "Khawvel khawi hmunah pawh Zo hnahthlak unaute tawrhna leh harsatna hi kan tawrhna leh kan harsatna a ni. Zo hnahthlak unau ṭanpui ngaia awmte theih ang chin chinah inpui tawnin, indâwm tawn ila,  hnam hrang hrang hmun hrang hranga awmte hi inlungrual ila, ṭanpui ngaih huna in­ṭanpui tawn leh inṭawiawm tawn zel turin rilru i siam thar ang u," a ti. Ṭanpuina thilpek hi Manipur Group YMA vice president Lalboa hoin Chassad khuaah an hlan a ni.