Covid-19 ah sorkarin dan thar a tichhuak
Ram hrang hranga Coronavirus (Covid-19) leng laka Mizoram mipui an him theih nan leh hriselna vawnhim nan Mizoram sorkar chuan 'The Epidemic Diseases Act 1897' behchhanin ‘The Mizoram Epidemic (COVID-19) Regulations, 2020’ a tichhuak. He dan hi kum khat chhung hman tur a ni a, dan zâwm lo leh bawhchhiate chu Indian Penal Code (IPC) Section 188 hmanga hrem theih a ni.
Dan tharin a sawi tlangpui
• Damdawi-in zawng zawng (sorkar leh private)-te’n Covid-19 vei rinhlelh/inringhlelte enna tur bik hmun an siam tur a ni a, an dinhmun azirin an ina inkhung (home quarantine) tur emaw, damdawi-ina enkawl (isolate) emaw turin an ti thei ang. Covid-19 vei emaw, rinhlelh emaw an neih chuan Health department-ah an hriattir vat tur a ni.
• Covid-19 chungchanga Mizoram kaihhnawih/dinhmun reng reng thu dik lo leh belhchian dâwl lo thehdarh phal a ni lo. Mizoram dinhmun dik tak chu Health Principal Director leh IDSP State Nodal Officer-te'n an puanzar chauh rin leh pawm tur a ni.
• Private laboratory-te’n Covid-19 test an ti tur a ni lo. Sorkarin a ṭul angin sample collection centre a ruat ang.
• Ni 28 kal ta chhunga Covid-19 awmna ram/hmun aṭanga Mizorama lutte chu sorkarin screening point a siamah an inhriattir ngei tur a ni. Sorkarin inkaihhruaina a siam ang zelin mahni inah emaw, sorkarin hmun a ruahmanah emaw awm/dah tur a ni a, an zâwm lo a nih chuan tihluihna hmangin thuneitute’n an dah lui thei ang. Awm hran chhungin inkaihhruaina ṭha takin an zawm tur a ni a, insawiselna an neih chuan state helpline-ah an inhriattir vat tur a ni.
• Mizoram páwn aṭanga lo lutte reng reng chu sorkarin screening point a siamah an inenfiahtir tur a ni.
• Mizoram pawna zin chhuak lo, insawiselna neite chuan a rang thei ang berin state helpline number 102 (toll free), 0389-2318336/ 0389-2323336-ah inhriattir vat tur a ni.
• Dan kengkawh tura thuneihna pek (authorised person)-te chuan a ṭul angin Mizoram páwn, Covid-19 lèn tawhna aṭanga lo kalte chu mahni ina inkhung tur emaw, quarantine centre-a awm turin an ti thei. Covid-19 veite awm dan anga awmte phei chu damdawi-in (isolation facility)-ah an dah nghal thei bawk. Thupek zâwm lote chu dan zâwm tura tihluih theihna tur thuneihna an nei a. Covid-19 vei ngeia rinhlelh an awmin, mipui leh khaw tlang himna tur nia ngaihah chuan an chennaah kal chilhin, damlo endik theihna leh a ṭul dan azirin damdawiin-ah an dah thei ang.
• Chief Secretary/DC thuneihna: Chhan ṭha tak a awm chuan DC-te’n an district huapin emaw, district chhunga hmun bik emawah a ṭul angin hma an la thei a; chu'ngte chu - hmun khâr (sealing), mi luh leh chhuah khap, school/office/ institution/ establishment khâr, mipui punkhawm khap, lirthei tlân khap, Covid-19 veite chhui zui, rinhlelhte khung hran, in awm sa quarantine/isolation facility atana hmantir leh sorkarin ṭul a tih thil dangte.
• DC tih theih angte hi state pum huapa kalpui a ngaih chuan Chief Secretary-in thuneihna a nei ang. DC-te hian an district-a sorkar hnathawkte Covid-19 dona kawngah a ṭul ang zelin mawhphurhna a pe thei a, sorkar hnathawk lote puihna pawh a ngen thei bawk.
• District Disaster Management Committee pawhin an district-ah ṭheuh hmalak dan tur an duang thei a, tihlawhtling turin sorkar officer dangte pawh DC-in a ruat thei.