MZP leh Bairabi NGO-te'n Zophai bulah Police leh Forest duty post dah an phût

MZP hruaitute leh Bairabi khuaa tlawmngai pawl hrang hrang hruaitute March 18, Nilainia Bairabia ṭhukhawm chuan resolution pass in, 'Zophai tlang Baibunah police duty post leh Forest beat post Mizoram sorkar hian dah ve rawh se' an ti.

Inkawmhonaah hian Bairabi NGO hruaitute chuan ramri chungchangah khawtlang hruaitute'n an ngaihdan hrang hrang an sawi a; hmalakho zel dan turte leh ramri chinfel a nih theih nana hmalak chhunzawm dan tur thil hrang hrang sawihoin, "Kan ramri chinfel a nih theih nan lungrual taka hmalakho zel ni se," an ti. Meeting chuan resolution pass in, 'Zophaia IR police awmte hi thuam ṭhat ni se, Zophai tlang Baibunah hian police duty post leh Forest beat post Mizoram sorkar hian dah ve rawh se' an ti a; resolution hi a hlawhtlin ngei theih nan hmalakho zel an rêl.

Nilaini vek hian MZP hruaitute chuan Zophaia Zofate Chawlhbuk sak an tumna hmun an tlawh a; MZP president B Vanlaltana chuan, MZP-in pipute sah zau Mizoram humhalha a awm theih nan ramri humhalh chu ṭhangtharte tih turah a ngaih thu a sawi. MZP President chuan, "Kan ram humhalha hma kan laknaah Zofate Chawlhbuk sa thei loa kan awm lai leh sorkar kan ngaihchan mek laiin, Mosolman biak-in sak chhunzawm a ni hi kan hrethiam lo hle. Mosolman biak-in hi sak chhunzawm leh a nih chuan Zofate Chawlhbuk kan sa ve nghal dawn a ni" a ti.

MZP chuan thuchhuah siamin, pi leh pute'n an thlah kal zel turte tan lu chhum bán chhum huama an lo sah zauh tawh lai leh na taka ram an humhalh laia Mizoram chhung ngei mi ram ang hiala tuna ngaih a lo ni ta chu pawi an tih thu sawiin, "Neih lêt leh theih loh ang hiala pilbo hret hret hi a pawi hle. Hemi chungchanga ṭhangtharte leh Zoram mipui thu dik hriattir a, chawh nuna a awm leh theih nan nasa takin hma kan la mek a ni," an ti a; a ṭul huna hman theih turin chawlhbûk sakna tur banril zawm hnatlang an neih thu an sawi.