Chakma aia Mizo hlamchhiah Hriatthiam a har kan ti - ZPM Ṭhalai

Zoram Peoples' Movement (ZPM) party ṭhalaite chuan thuchhuah siamin, Chawngteah Mizo leh Chakma zirlaite inkara intibuaina thleng nia sawi chungchanga hmalaknaah Chakma-te aiin Mizote hlamchhiah an ni zawk niin an tarlang a, hriatthiam har an tih thu an sawi.

ZPM ṭhalai chuan, September 26-28, 2017 inkara Chawngte Higher Secondary School sport neih a nih laiin Mizo zirlaite chu Chakma mi, football khelh tumte'n an tihbuai avangin buaina a chhuak nia sawi a nih thu tarlangin, "Chinfel a ni tawhah mipuiin an ngaih laiin, he buaina kaihhnawihah Mizo zirlai thlavâng hauhtu MSU hruaitute'n February 4, 2020-a Court-a inlan tura tihna an hmu ta mai hi hriatthiam har kan ti hle a ni," an ti.

ZPM ṭhalai tarlan danin, buaina chungchangah khatih laia minister of state C Ngunlianchunga'n October 6, 2017-ah a pisaah Tuichawng bialtu MLA Dr BD Chakma, CADC-a MDC pathum, Chakma House LO leh Assistant LO te, MSU hruaitu te, Aizawl City College Joint Students Union (ACCJSU) hruaitu te, Mizoram Chakma Students Union (MCSU) hruaitute leh Young Chakma Association (YCA) aiawhte ko khawmin buaina chinfel dan tur a sawipui a, resolution an siam a ni.

Resolution-ah chuan, Chawngte HSS sport laia Chakma ṭhalaite'n an tihbuai kal zela buaina chhuak chu an dem thu te, thleng tawh lo se an duh thu leh social media-ah a punlun zawnga thehdarh a nih loh nana hmalak tlàn an duh thu te, buaina thlenga mawhphurtute dan anga hrem te, kut tuartute chhawmdawlna pek ngai an awm chuan a ṭul anga pek te, Bangladesh aṭanga dan loa foreigner lutte dapchhuah kawngah hmalakho 

ṭhin te, MSU leh ACCJSU-te'n Chakma House-a mikhual thlen an phalsak loh chu hawn leh phalsaktur thute an tarlang.

ZPM ṭhalai chuan, resolution bawhzuinaah Mizote hlamchhiah an ni zawk tlat nia sawiin, hriatthiam har an tih thu an tarlang a; MSU hruaitute laka FIR thehluttu, Chakma House LO PK Tongchangya chu FIR hnûk lêt thuai tura an hriattir thu an sawi bawk.