KHAWTHLIR

United Pentecostal Church (NEI) chuan Covid-19 laka invenna atana tualchhung kohhran inkhawm leh inkhawm loh chung­chang chu tualchhung kohhran committee kutah dah a nih thu an tarlang. Hri léng laka him theih nan ṭhahnem ngai taka ṭawngṭai ṭheuh tur leh chhuak vâk tam lo turin kohhran mipui an chah bawk.

Coronavirus laka invèn nan Sialsuk V/C chuan Sialsuk tlang chu nimin aṭanga April 15, 2020 thleng mipui tlawh theih loh tura khar a nih thu an puang. Vangchhia Branch YMA pawhin Kawtchhuah Ropui leh Vangchhia khuaa pípúte sûlhnu hmunte chu nimin aṭang khan tiam chin awm loa khâr rih a nih thu an puang bawk a, mipui hriatthiamna an ngen a ni.

Mizo Writers Association (MWA) chuan ṭawng danga ziah lehkhabu, Mizo ṭawnga lehlin ṭha ber thlanna, Translation Book Award 2019 kal mekah a ṭha zual pathum an thlang chhuak. A ṭha zual pathumte chu - 'Allah aiah Isua' (letlingtu Lalrinzuala Pachuau), 'Pathian a awm' (letlingtu Lalrammawia Ngente) leh, 'The Last girl' (letlingtu Lalzarzova Khiangte)-te a ni.

MNF party ṭhalai leh Mizo Students' Union (MSU)-te chuan March 16, 2020 zana Manipur-a Kuki khaw pakhat Chassad khuaa in eng emaw zat hâl a ni chu pawi an tih thu an tarlang. MNYF chuan, India hmarchhaka tláng mite chu inngeih leh inrem taka an awm an duh thu an sawi a; MSU chuan, Chassad khua hâltute chu man a, hrem ngei an phût thu sawiin, "Kuki chhungkuate’n chhawmdawlna leh zangnadawmna an dawn ngei theih nan Manipur sorkar kan ngen a ni," an ti.

AMC Ward No. 5 councillor Rosiamngheta chuan Covid-19 laka invenna chi khat atan Chanmari Veng kawnah kut silfaina tur a dah. Sorkar office hrang hrangte leh dawr ṭhenkhatah pawh luhkâah kut silfaina dah an awm tawh a ni.

Coronavirus laka invèn nan MPC party chuan an party pisa chu tiam chin awm loin vawiin aṭangin an khâr dawn. MPC chuan, an pisa hawn leh hun tur chu thil awm dan azirin la inhriattir leh tur a nih thu an sawi a; Brig. T Sailo thih champha vawi 5 puala March 27, 2020-a exhibition programme an duan tawh pawh ṭhulh a nih thu an tarlang. PRISM Party Central Committee nimina ṭhukhawm pawhin Covid-19 vangin vawiin aṭangin an party pisa tiamchin awm loa khar an rel a, "He hrileng chungchangah Zoram mipuite tan sorkarin theihtawp an chhuah hi ṭha kan ti a, mipui thlamuanpui thama hma la turin kan beisei," an ti.

MPSC chuan thuchhuah siamin, ram eng emaw zata Covid-19 lêng laka Mizoram mipui an him theih nan sor­kar thuchhuak bawhzuiin hna lakna tura exam leh personal interview hun an ruahman tawh, March 23, 2020 hnu lama mi zawng chu tiam chin awm loin ṭhulh a nih thu an tarlang. Exam hun tur chu MPSC website www.mpsc.mizoram.gov.in leh mobile app MIPUSEC-ahte inhriattir leh a ni ang.

Mizoram Presbyterian Koh­hran chuan office circular tichhuakin, Sakrament department leh kohhran mite'n Synod office leh Synod hnuai­a department hrang hrang tlawha excursion an neih ṭhin chu April 15, 2020 thleng chuan a rem tawh rih loh thu an tarlang a; kohhran mite hriatthiamna an ngen.