Assembly Session neih ṭan a ni

Ni thum awh tur Eight Legislative Assem­bly of Mizoram session vawi riatna chu nimin khan ṭan a ni a, session hnuhnung ber neih zawh hnua thi House member hlui pahnih sun an ni.

House-a an sunte hi minister hlui PC Zoram Sangliana leh MLA a nih laia thi Andrew H Thanglianate an ni.

An chanchin sawitu chief minister Zoramthanga chuan mimal, House leh ram ang pawhin kan chan ropui thu sawiin, "Sunna hun neih a ṭul hi pawi kan tiin, kan ui em em a ni. Dam tlang tur kan awm loh avangin tawrh thiam erawh a ngai a ni," a ti.

PC Zoram Sangliana leh Andrew H Thang­lianate uina thu CLP leader Zodintluanga, ZLP dy. leader Vanlalhlana, KT Rokhaw (INC), Lalruatkima (MNF) leh Dr ZR Thiamsanga (MNF) te pawhin an sawi. Uina thu sawi zawhah speaker Lalrinliana Sailo kaihhruaina hnuaiah sunna atan member-te minute khat ngawi rengin an ding.

PC Zoram Sangliana hi May 9, 1956 khan piangin, April 24, 2021 khan Zoram Medical College-ah Covid-19 avangin a thi. MLA-ah ṭum nga - Tlungvel bial aṭangin kum 1987, 1989, 1993 leh Kolasib bial aṭangin kum 2008 leh 2013-ah thlan tlin a ni. Kum 1989 leh 1993-ah minister of state niin, kum 1998-a thlan tlin a nihin cabinet minister a ni thung.

Andrew H Thangliana hi October 4, 1977-ah a piang a, August 17, 2021 khan Ebenezer Hospital, Aizawlah a thi. Andrew H Thangliana hi kum 2018 MLA inthlanah khan ZPM aṭangin independent-in Tuirial bialah thlan tlin a ni a, ṭum khat MLA candidate a nihna a ni. A thih ni thlengin MLA a ni.

Session-ah hian Finance changtu chief minister Zoramthanga chuan Report of Comptroller and Auditor General of India Finance Accounts, 2019-2020 Volume I, Volume II and Appropriation Accounts 2019-2020 a pharh.

Chumi hnuah Taxation minister Lal­chamliana a awm loh avangin a aiawhin Chief Minister hian The Notifications issued under Mizoram Goods and Service Tax Act, 2017 (wef. 3.3.2021 - 9.7.2021) leh The Mizoram Private Placement Agencies (Regulation), Rules, 2017 a pharh leh.

Taxation Minister a awm loh avang vekin CM chuan 'The Mizoram Goods and Services Tax (Amendment), Bill, 2021 chu House-ah a pulut a, sawiho a nih hnuah pawm a ni.