Lungleia tualthattu man a la ni lo

Thawhṭanni zan dar 6:15 vel khan Vanlalduati (52), Lunglei Chanmari-II chu an venga a dawr Duati Sumo Counter chhungah tu tih hriat lohin chemte nena beiin, a dawrah hian a thi. He thu ziahlai hian tualthattu man a la ni lo.

Lunglei aṭanga Vanglaini thudawn danin, Vanlalduati hi a counter paltlanga Sumo kal pakhat a thlen tlai dawn avangin a dawrah hian a awm khawtlai a, tawhsual a tawk ta a ni.

Ruang hmu hmasa bertuin Police-te a hrilh danin dawr kawngkhar chu chhung lamah hruia inṭawnin, inkhar chiang lutuk loin a hmu a, a pawh hawn chuan Vanlalduati chhuata let reng leh a bula mi pakhat lo ṭhu tung a hmu.

Vanlalduati bula ṭhu hian dawr hawngtu chu ṭanpuitu au turin a ti a, ṭanpuitu a zawn hlanin dawr chhunga awm hi a tlanchhia a, dawr piah lawk kawng pengah a tlan liam a ni. Ruang bula lo ṭhu hi feet 5:2 vel, ngo lutuk lo, hang lutuk lo a ni.

Vanlalduati kutthlaktu hian a chemte hman dawrah hian a tlansan a, chemte fawngah hian R tih rawng engin a inziak. Police-te chuan chemte thlalak thehdarhin a chhertu emaw a neitu hria chu anmahni hriattir turin an ngen.

Hetihlai hian nimin zing khan Lunglei Chanmari Venga BDO pisa kawtah Vanlalduati vihna chemte pâi ni ngeia rin chhar a ni a, Farm Venga mi bawlhhlawh bawmah Vanlalduati bag a chhunga Rs. 3,000 awm chhar a ni thung.

Lunglei Police-te chuan theih­tawp chhuaha tualthattu an chhui thu thuthar thehdarhtute hrilhin, "Rinhleh man emaw, thuzawhfiah tura lak kan la nei lo," an ti.