RT-PCR leh a tlukpui khawl hmanga in test-ah Hmarchhakah Mizoram pahnihna a ni - IDSP

Integrated Disease Surveillance Programme (IDSP) state nodal officer Dr Pachuau Lalmalsawma chuan RT-PCR leh a tlukpui khawl hmanga in test tam lamah Mizoram chu hmarchhak state zingah a in test tam ber dawttu a nih thu sawiin, "Test hrim hrim percentage chu a sang ber," a ti.

Dr Pachuau Lalmal­sawma hian nimin khan Secretariat conference hall-ah thuthar theh­darhtute kawmin, Covid-19 do kawngah theih­­tawp an chhuah thu a sawi a, "Kan hmalaknate duh­thusam erawh a ni kher lo ang. Covid-19 hian virus dang a hring zel a, thawktute thawh ringawtin duhthusam a thlen tawh lo. Kan ṭangrual viau tho a, mipui nen kan ṭanrual lehzual a pawimawh," a ti.

Central sorkarin hma­lakna ṭha leh Pathian venna zarah Mizoram chu harsatna liantham nei loah a ngaih thu sawiin IDSP Nodal Officer chuan, "April, 2021 aṭangin case a pung chho tial tial a, kum lama naupang zawkte pawh nunna chan an awm," a ti a, Covid-19 tir lama positive hmuh­chhuah zingah state pawn aṭang rawn haw an tam laiin, tualchhunga inkai leh kaina chin hriat loh an pun chak thu a sawi.

Dr Pachuau Lalmal­sawma chuan Covid-19 veite hmuhchhuah zung zung an nih a, enkawl vat an nih theihna atan test ngawrh taka kalpui a nih thu sawiin, "September 5, 2021 thleng khan hmarchhak state zingah population based-in test ti tam ber kan ni a, India ram pumah top 10 ah kan lang phak. RT-PCR, TrueNat leh CB-NAAT a test-a tamah Mizoram chu hmarchhakah pahnihna kan ni," a ti.

IDSP Nodal Officer chuan mass test chungchang sawiin, "Aizawla veng 56 leh khaw 22, a vaiin hmun 78-ah mass test nei tawh niin, Covid-19 vei 3,229 hmuh an ni tawh a, test aṭangin 3.02% a ni. Mass test nei lo ila khawtual anga kai a hlauhawm. Kan dinhmun dik tak hriatna atana ti kan ni," a ti a, mass test chu term nei a nih avangin ṭul bikna a awm bakin kalpui a nih loh ṭep tawh thu a sawi.

Mipuite'n Covid-19 avanga inkaihhruaina siam (CAB) an zawm ṭhat a ṭul thu sawiin Dr Pachuau Lalmalsawma chuan, "Contact Tracing Team leh research kan tih aṭangin, chhhungkhat, colony, ṭhianho, thil tihho etc. aṭanga inkaidarh an tam. CAB zawm ṭhat loh chuan a hlawhtlinna tak tak hmuh a har dawnin a hriat. Mipui zirtirna a kal nasa a, kan hre hnem a, a tak nunpui kan harsat thung," a ti.

Zoram Medical College-a Covid-19 incharge Dr PC Lalramenga chuan Covid-19 variant thar ho chu inkaichhawn a awlsam thu sawiin, "A hma mi aiin a hlauhawm zawk tih finfiahna tak awm lo mah se, a chiang a ni. Sorkar laipuiin India ram pum chu third wave atan inbuatsaih turin an ti a, keini pawhin guideline-te kan siam," a ti a, inbuatsaihna atana ruahmanna an neihte niminah sorkara an thehluh thu a sawi.

ZMC-a microbiologist Dr Gracy Laldinmawii chuan RT-PCR leh TrueNat chu ang khata ICMR-in a ngaih, molecular test-na a nih thu sawiin, "TrueNat hian khawl hmang vekin a test a, a awlsam em em a ni. A awlsam em avangin India ramah demand a sang hle. Mizoram hi kan vannei takzet, district tina kan nei thei hi," a ti.