KHAWTHLIR

Panel of Chairman
Assembly speaker Lalrinliana Sailo chuan nimin khan Assembly Session neih mekah speaker leh dy. speaker an awm loa House kaihruai tur Panel of Chairman atan Nihar Kanti Chakma (INC), Lawmawma Tochhawng (MNF), H Biakzauva (MNF) leh Dr Vanlalthlana (ZPM) te ruat an nih thu a puang.

SMATEE hriattirna
Higher & Technical Education (Technical) Joint Director chuan nimin khan State Medical and Technical Entrance Examination (SMATEEI), 2021 exam turte hriat tur a tihchhuak a, SMATEE chungchanga hriattirna pawimawh tih chhuahte dhte.mizoram.gov.in leh www.smatee.com-ah en turin a hriattir. September 9, 2021-a exam turah Covid-19 positive leh home quarantine-te an exam dawn loa, September 23, 2021-ah a hranin exam buatsaih a ni dawn.

ASF tanpuina pe lo
Congress Legislature Party leader Zodintluanga zawhna chhangin AH & Vety minister Dr K Beichhua chuan, African Swine Fever avanga Mizorama harsatna tawk chhungkuate hnenah ṭanpuina pek an la nih loh thu House a hrilh.

Pipe phum dawn
Chanmari David’s Kitchen aṭanga Zarkawt kâwn inkar kawngpuiah vawiin aṭanga September 17, 2021 zing dar 10 aṭanga zan dar 8 thleng SIPMIU in pipe phum hna an thawh dawn avangin hna thawh chhungin kawngpui chanve khar a ni dawn a, Traffic SP Rodingliana Chawngthu chuan fimkhur tak leh hnathawkte ngaichang chunga lirthei khalh turin mipuite a hriattir. Hnathawhna huam chhung kawngpui sirah lirthei leh bungrua dah phal a nih loh thu a tarlang bawk.

Covid-19 sawiho
Health minister Dr R Lalthangliana hoin nimin khan a pisa-ah sorkar hotute leh Mizoram sorkar hnuaia Public Health Expert doctor-te'n Mizorama Covid-19 hri leng meka restricted area/red zone leh micro-containment area puan dan leh puan chhunga hmalak dan, CCCC kalpui dan leh home isolation leh sample test kalphung atana rawtna chi hrang hrangte an sawiho.