Health Minister leh MKHC hruaitute'n Hri lénga hmalak dan tur an sawiho

Health minister Dr R Lal­thangliana chuan nimin khan ram tam taka Covid-19 léng mek chungchangah Mizoram Kohhran Hruaitute Committee (MKHC) hruaitute a kâwm a, hmalakho zel dan tur a sawipui.

Health Minister chuan, Co­vid-19 dona kawngah leh mipui him zawkna tura kohhran hrang hrang hmalaknaah lawmthu a sawi a, "Kohhran ṭhenkhat phei chuan fimkhur thilah biak-ina inkhawm an titawp rih hial a ni. Kohhran member-te himna ngaih pawimawh a ni hi Health Minister ka nihna angin chhuanawm ka ti a, hmalakna duhawm tak a ni," a ti.

Chhungkaw tam tak eizawnna bazarah mi tam tak ni tin an la kal reng chu mipui tan a him loh avangin Commerce & Industries Minister a nihna angin AMC Mayor leh official, Commerce & Industries Secretary leh department lamte nen hmalak dan tur an ngaihtuah mek tih sawiin R Lalthangliana chuan, Covid-19 vanga thi sawngbawl dan turah pawh State Level Task Force-in damdawi lam mithiamte nen an sawiho dawn thu a sawi.

Health & Family Welfare Board vice chairman Dr ZR Thiam­sanga pawhin, kohhran leh tlawmngai pawlte'n sorkar ngenna leh hmalakna ṭha taka an thlàwp ṭhin avangin lawmawm a tih thu a sawi a, "Kohhran aw chu mipuiin an ngai pawimawh a ni," a ti.

Chief secretary Lalnunmawia Chuaungo chuan, international border zingah Zokhawthar chauh inkalpawhna atan hawn a nih thu sawiin, "Screening uluk taka neih a ni. Mizoram mamawh châkkhai lakna kalkawng zingah Bairabi leh Vairengte hawn niin, screening neih zel a ni a, online Inner Line Permit (ILP) tihtawp rih a ni," a ti a; DC office-a ILP diltute chu DC-te'n an ngaihtuah hnuah loh theih loh thilah chauh pek a nih thu a sawi.

Inkawmhonaah hian, chawlhkar tin chhuak kohhran chanchinbuah Covid-19 laka invènna atana tih tur leh tih loh tur chhuah tura hmalak an rél a; inneih, lungphun leh programme dang kal khawmna tlem zawka tih a nih theih nan inkaihhruaina mumal tak siam turin MKHC an ti bawk.