LDLOA-in KMMTTP zangnadawmna sawifiah

Lawngtlai District Land Owner’s Association (LDLOA) chuan thuchhuah siamin, Kaladan Multi Modal Transit Transport Project (KMMTTP) zangnadawmna chungchang an sawifiah.

LDLOA chuan September 2, 2021 Vanglaini chhuaka 'PWD document-a a lan danin, KMMTTP kawnglaihna tura ram lakah zangnadawmna phuttute ram sawi zau zawng chu Mizoram pumpui zau zawng aiin sq.km 4895.05 in a zau zawk' tih tarlan chu mak an tih thu tarlangin, "Thu dik lo chhuah hi pawi kan tiin ṭha kan ti lo hle. PWD document ṭan chhana sawi hi belhchian a dawl lo hleah kan ngai," an ti.

Project ṭan tirh deuhah zangna-dawmna a dil theih thu hriat a nih thu tarlangin LDLOA chuan, "Kawngin a tlawh tur khuate'n ram pass kengin Lawngtlai DC office-ah theh luh a ni," an ti a, hetih hunlai hian tumah chiang taka kawng kalna tur dik tak hria an awm loh thu an sawi.

LDLOA tarlan danin, chhuah lam rama kawng kalnaahte tlak lam rama pass neite'n an pass an submit a, tlak lam rama kawng kalnaah pawh chhuah lam ram pass neite'n an submit a ni. Heng bakah hian a dil tur dik tak, kawngin a paltlang ngeite'n pass an submit a, pass submit hi a tam ta hle a ni. Tin, he kawngpui hian Village Council khaw 10 a tlawh a, pass submit hi a tam lo thei lo a ni.

Zangnadawmna beiseitute beiseina avangin action lak a lo ngai ta a, amaherawhchu sorkarin a beisei aia pass submit a lo tam tak viau avangin thil tihfel a lo harsa ta a, a chinfel hna ngaihtuah turin Lawngtlai DC-in team a din a ni.

Team-ah hian Addl.DC chu Chaiman niin member atan DC pisa aiawh, LADC aiawh, Lawngtlai PWD aiawh, Central YLA aiawh, LSA aiawh leh Land Owner’s Association aiawhte an ni.

Team chuan ngun taka thlirin mi 500 dawn kawngin a tlawh loh leh zangnadawmna list an siam thu tarlangin LDLOA chuan, "Heng mite hian vawiin ni thlengin engmah an sawi zui lo a, zangnadawmna pawh an beisei tawh hek lo. Pass thehluh zawng zawng tam lai ber document ṭan chhan chung pawh hian sq. km. 5 pawh a tling thei lo hrim hrim a ni," an ti.

LDLOA chuan zangna-dawmna dil thei ram neitute pawhin an harsatna leh buainate sorkarah an thlen ve zel tih tarlangin, "Zangnadawmna dil thei a ngaihte hi mi 303 an ni a, an claim ram zau zawng chu sq. km. 1.54 a ni," an ti a, an harsatnate Chief Secretary level a thlen tak avangin Anti-Corruption Bureau-in an enfiah tak thu an sawi.

Vawi tam tak spot verification neih a nih hnuah 303 aṭangin, Zochachhuah khuate compen-sation an pek hnuah mi 138 zangnadawmna pek nise, mi 102 te chu an pass enfiah leh tura tih a nih thu tarlangin LDLOA chuan, "Heng kan han sawi tak zawng zawngah hian sorkar document kan nei vek a ni. Heta ṭang hian ram neitute'n zangnadawmna an phut area zat chu sq. km. 2 pawh a tling lo," an ti.