Champhai district-ah CD ratio 43.14%

Champhai District Consultative Committee (DCC)/ District Level Review Committee (DLRC) chu an chairman Maria CT Zuali, Champhai DC hoin nimin khan DC conference hall-ah an ṭhukhawm. Kumin June-August thla chhunga Champhai district-a bank hrang hrang credit deposit (CD) ratio chu 43.14% a ni tih an tarlang.

Maria CT Zuali chuan hripui leng vanga sum leh pai harsatna awm mek karah bank-te chu an pawimawh thu leh chak zawka hma an lak a ṭul thu a sawi a, "Kuthnathawktu leh loneitute chawikang tura ṭan laka ngaia, bank-a thawktute pawh kuthnathawktu leh loneitute ṭanpui turin in in hawn reng a pawimawh," a ti.

Loneitute'n an chhawr ṭangkai theih tur sorkar scheme-te dah pawimawh hmasa tura bank-te ngenin Bawrhsap chuan,"Social Security Schemes, loan pek chhuah theih leh bank kaltlanga hmaṭhatna awm ṭhin te zau zawka puanzar a nih theih nan Financial Literacy Campaign tam zawk nei ṭheuh turin ka duh che u a ni," a ti bawk.

Meeting-a tarlan danin June 2021 quarter chhungin Champhai district bank hrang hrang CD ratio chu 43.14% a ni a, March quarter tawpa CD ratio 44.53% aiin 1.39 % in a tlem zawk. CD Ratio hian bituk zat 60% a phak lo a ni.

2021-2022 financial year chhunga Annual Credit Plan hnuaia hnathawhte thlirho a ni a - priority sector atana target cheng nuai 13,010.70 aṭangin cheng nuai 4,269.93 (32.81%) tihhlawhtlin a ni. Non-priority sector hnuaia target cheng nuai 1,364 aṭangin cheng nuai 343.68 (25.19%) tihhlawhtlin a ni a, PMMY hnuaiah mi 185 (Sishu-121, Kishore-57, Tarun-7) te hnenah loan cheng nuai 181.99 pekchhuah a ni tawh.

June 2021 quarter tawp thleng khan Social Security Schemes PMJDY hnuaiah mi 23,299 ziak luh an ni a, PMJJBY hnuaiah mi 9,139, PMSBY hnuaiah mi 14,940 leh APY hnuaiah mi 474 te ziah luh an ni bawk.

Tun dinhmunah Champhai district-ah bank branch hrang hrang 17, public sector bank leh private sector bank panga ve ve, regional rural bank paruk leh state cooperative bank pakhat a awm.