Positive thar hmuh tam lamah India ramah Mizoram 4-na ; Hmar chhak state-ah 1-na

Sept. 6, Thawh­ṭannia Mizorama Covid-19 vei mi 1,468 hmuh chhuah chu hmuh chhuah tam ber ní a ni a; India rama state zingah Mizoram aia hripui vei hmuh thar tamna state pathum chiah a awm a, a záwnin chawlhkar hnih chhung India hmarchhak state-ah hmuh chhuah tam berna a ni tawh bawk.

Nimin zinga sorkar laipuiin Covid-19 report a tihchhuaha a lan danin, September 6-a Mizoram aia Covid-19 vei hmuh tamna state pathumte chu - Kerala (19,688), Maharashtra (3,626) leh Tamil Nadu (1,556)-te an ni a; state dang 24 leh union territory pariatte chu Mizoram aia hripui vei hmuh thar tlemna vek a ni.

Nimin zinga Covid-19 positive result tihchhuah a nih khan Mizoramah hripui vei enkawl mek mi 11,414 an awm. India rama Covid-19 positive enkawl mek tam lamah parukna a ni a; Mizoram aia hripui vei enkawl lai tamnate chu - Kerala (2,39,228), Maharashtra (51,234), Karnataka (17,412), Tamil Nadu (16,256) leh Andhra Pradesh (14,550)-te an ni.