Mizoramah Covid-19 vangin lockdown ṭum 19 leh partial lockdown ṭum 12 puan a ni tawh

ZLP member VL Zaithanzama zawhna Disaster Manage-ment & Rehabilitation minister Lalchamliana'n ziaka a chhan danin, Mizoram sorkar chuan Covid-19 avangin March 25, 2020 aṭanga September 4, 2021 chhungin lockdown ṭum 19 leh partial lockdown ṭum 11 a puang tawh.

September 4 hnu hian partial lockdown hi ṭum khat puan leh tawh a nih avangin partial lockdown puan tawh zat chu ṭum 12 a ni. Hetihlai hian lockdown puan ṭhenkhat hi chuan Aizawl Municipal Council huam chhung chauh a huam a, district dangah chuan DC-te'n ṭul an tih anga ruahmanna siam a ni.

March 25, 2020 aṭanga September 4, 2021 inkarah hian October 26, 2020 aṭanga April 19, 2021 chhungin lockdown emaw partial lockdown emaw puan a ni loa, inkaihhruaina erawh siam a ni thung.