Aizawl-Delhi direct flight hawng

Jet Airways chuan Aizawl leh Delhi inkarah chawlh lailâwk awm loin nimin aṭang khan thlawhtheihna an thlawhtir ṭan a, Mizoram Youth Com­mission (MYC) chairman Joseph Lalhimpuia, MLA-in Lengpui Airport-ah a hawng.

Joseph Lalhimpuia chuan, Jet Airways-in khualzin mite leh ṭulna dang neite tana Aizawl-Delhi direct flight a siam chu lawmawm a tih thu a sawi a; Jet Airways hotute chuan an airlines-ah Mizo ṭhalaite hna tam zawk pe turin a ngen nghal.

Jet Airways hotute pawhin Mizo khualzinte'n an thlawh hun (flight timing) ngai pawimawh ṭhin se an duh thu an sawi bawk.

Jet Airways hian Aizawl leh Delhi inkarah direct flight an thlawhtir reng tawh a, mahse, Guwahati-ah darkar khat chhung chawlh a ni ṭhin. Tunah erawh chuan Guwahati-ah chawl tawh loin, Aizawl-Delhi inkarah a thlawk tlang tawh dawn a ni.