Mipui duh danin DC kan sawn - Chief Minister

Nimin Assembly session-ah chief minister Lal Thanhawla chuan, Lawngtlai DC Dr Arun T an sawn chhuah chhan chu district chhunga mipuite ngenna vang a nih thu House a hrilh.

MNF member Dr K Beichhua'n CADC ṭhiah a nih hnu lawka Lawngtlai DC sawn a nih chhan a zawhna chhangin Chief Minister chuan, "Hmân aṭang tawhin DC ni lai hi a fel lo an tih vang ni loin, a bial chhung mipuite'n Mizo ngei an duhthu an sawi ṭhin a, MLA-te pawhin an sawi ṭhin. Tun hi hun remchangah hmangin an duh dan angin Mizo dah a ni," a ti.

Lal Thanhawla chuan, DC atana an dah thar tâk chu Lai, Mara leh Chakma-te pawm tlân theih a nih thu sawiin, "Saw lam mi ni bawk, Mizo ngei kan dah a ni," a ti. Lawngtlai DC atan hian Disaster Management & Rehabilitation director N Chakhai chu March 22, 2018-ah dah thar a ni.