Kawng siam dana an lungawi loh vangin PWD Minister, SE leh EE thlalak hal a ni

Aizawl-Lunglei World Bank Road-a Tlawng leh Pukpui inkar kawngpui siam dana an lungawi loh vangin, Lunglei Ṭhalai Pawl (LṬP) tih invuahte chuan nimin khan PWD minister Lal Thanzara leh PWD Lunglei Circle-a SE Lalchhuana leh Lunglei Division-a EE Lalchhuana te thlalak an hâl.

LṬP-te hian resolution pass-in, kawngpui chu a siam dan tur dik tak leh a ṭha thei ang bera siam an phût thu an tarlang a; kawng siam enkawltu PWD SE leh EE-te chu an enkawl kawng siam a chhiat em avangin suspend an phût thu an sawi.

LṬP hian, PWD Minister-in a tiam angin, PWD Road Division, Lunglei-in a chan chin, Lunglei-Kanghmun South siamna tur cheng nuai 250 chu sorkarin a release nghal an phût a; "PWD hian Pukpui-Kawmzawl road an khawih mek hi estimate zat min hrilh rawh se, an siam mek pawh ṭha takin siam rawh se," an ti.

LṬP-te hian kawng siam a chhiat avangin, a chhe zual laite chu nimin khan tihchhiat tumin an inko khawm a, a hmunah pawh an kal a; mahse, police eng emaw zat an duty avangin an tichhe lo nia thu dawn a ni.

Nimin vek hian LṬP-te chuan Lunglei PS OC hnenah FIR an thehlut a, PWD SE leh EE te chu transfer mai tur an nih thu tar­langin, "SE leh EE-te hian Lung­lei an chhuahsan lohna atan leh kawng siam hna chhe lutuk mai hi mawhphurtu min man chhuah sak a, an chunga action min laksak turin kan ngen a che," an ti.

Lunglei Ṭhalai Pawl te, PWD hotute leh police hotute chu nimin tlai dar 3 khan Lunglei DC Lal­zarmawii'n a pisaah koin, thil awm dan a sawipui.