Bank-te'n sorkar thu an tihlawhtling ṭha lo

Mizoram sorkarin Minimum Wages Act, 1948 (Act no. XI) hnuaia The Mizoram Minimum Wages Rules 1992 anga hna thawktute hlawh pe turin bank-te a hriattir tawh a, mahse, bank lamin an tihlawhtling ṭha lo nia thu dawn a ni.

Labour, Employment & Industrial Training (LEIT) department hotute hnen aṭanga thu dawn danin, LEIT department-in Mizorama bank-te chu minimum wages anga an hnuaia thawkte hlawh pe turin ṭum hnih lehkha a pe tawh a, mahse, bank-te chuan an la chhang lo. Industry pakhat lakah hmalakna nei tawhin, chhui chiang lehzual turin hma an la mek bawk.

Mizorama bank ṭhenkhatin an hnuaia thawk ṭhenkhatte minimum wages anga hlawh an pek loh avangin, chumi chungchang chu LEIT department-ah hriattir a ni a; LEIT chuan May 5, 2017 leh August 10, 2017 khan Mizorama bank zawng zawng hnena hma la turin lead bank-a Chief Manager hnenah lehkha an pe a ni.

Bank hrang hrangte'n an hnuaia thawkte hlawh an pek dan kimchang tun thlengin LEIT-ah an la hriattir thei lo a; IDBI Bank erawh chuan an hnuaia thawkte chu minimum wages anga hlawh an pek tawh thu an hriattir tawh thung. Tun dinhmunah Mizoram pumah bank 27 a awm mek.

Hetih lai hian, industry pakhat chu an mi chhawrte hlawh an pek danah minimum wages anga an chhawr loh avangin LEIT department-in lehkha an pe a; chu Industry chuan an mi chhawrte nen hlawh zatah an inbe rem tih hriattir mah se, LEIT chuan officer pakhat an chhuitir a, a chhuitu officer chuan report a la pe lo a ni.

LEIT department hotute sawi danin, The Mizoram Minimum Wages Rules, 1992 angin scheduled employment paruk awm tawh zingah pathum kalpui a ni tawh a; chungte chu thiamna lamah unskilled, semi skilled, skilled-II leh skilled-I ah ṭhen a ni. Hna thawhna hmun azirin ṭhen a ni bawk.

LEIT department hotute chuan, Mizoram sorkara muster roll-te chu The Mizoram Minimum Wages Rules, 1992 anga chhawr, department hrang hranga mite dinhmun a buaithlak hle niin an sawi a; an dinhmun a harsat em avangin Mizoram sorkarin Chief Secretary kaihruaina hnuaiah Study Group a din tawh niin an sawi bawk a ni.