KHAWTHLIR

NCD clinic
National Programme for Healthcare of the Elderly (NPHCE), National Programme for Prevention and Control of Cancer, Diabetes, Cardiovascular Disease and Stroke (NPCDCS), National Programme for Prevention and Control of Deafness (NPPCD) leh Mission Vengthlang MUP-te chuan nimin khan Mission Vengthlang Primary School-ah Non-Communicable Diseases (NCD) awareness campaign leh free clinic an buatsaih. He hun hi Health minister Lal Thanzara'n a hawng a ni.

Bank chawlh
General Administrative Deptt chuan thuchhuah siamin, April 2, 2018 chu Mizoram chhunga bank awm zawng zawngte tan chawlhah a puang.

Pahnih pawtsei
DPAR changtu chief minister Lal Thanhawla chuan MNF member Lalruatkima zawhna chhangin, DPAR (GSW)-in kum 2017-18 chhungin sorkar hnathawk pension tawh rawih nawn phalna mi pahnih hnenah a pek thu House a hrilh.

Rifle mu man
West Phaileng Police Station-a police-te chuan SDPO hoin March 25, Pathianni zan dar 9:45 khan Dâpchhuahah AK-47 rifle mu 2,060 an man. Silai mu neitu nia hriat Vanramthanga (42) s/o K Saipṭkhupa, Tlabung leh D Lallaizauva (26) s/o D Lalthangliana, Hunthar Veng, Aizawl-te an man nghal. Silai mute hi Bangladesh-a thawn luh tur nia hriat a ni.

Meizial man
Serchhip District Legal Metrology leh Anti Tobacco Squad ṭangkawp chuan nimin khan Serchhip khawpuia dawr hrang hrangah dan loa foreign cigarette zawrh dap hna an thawk a; foreign cigarette eng emaw zat manin, seizure memo an pe a, Legal Metrology office-a kal turin an hriattir a ni.

Tlân phal lo
PWD chuan nimin aṭang khan April 14, 2018 thlengin State Guest House pêng, Chaltlang Lili Veng aṭanga Bawngkawng kawngpui pengṭhuam inkar siamṭhat hna an thawk a; hei vang hian hna thawh hun chhung (chhun leh zan)-ah lirthei eng chi mah tlân tlang phal a ni lo.